Тбилисида Саакашвили иштирокидаги биринчи суд бошланди. Уни қўллаб-қувватлаш учун суд биноси олдига юзлаб намойишчилар йиғилди (видео)

Тбилиси шаҳар судида 29 ноябрь куни Грузиянинг собиқ президенти Михаил Саакашвили устидан суд жараёни бошланди. Бу Саакашвили иштирокида олиб борилаётган биринчи суд мажлиси, деб ёзади «Известия».

«Gazeta.ru»нинг хабар беришича, Саакашвили судда прокуратура ва Грузия адлиясининг айбловларини тан олмаслигини билдирди. Собиқ президентнинг адвокати Шота Тутберидзе суд залидан трансляция олиб борди.

«Мен прокуратура ва Грузия адлиясининг айбловини тан олмайман. Мен бу ерга олдиндан ёзилган комедиянинг бир қисмига айланиш учун келганим йўқ», — деди Грузиянинг собиқ раҳбари.

Саакашвили устидан суд мажлиси 2007 йил 7 ноябрдаги митингни зўравонлик билан тарқатиб юбориш ва «Имеди» телекомпанияси офисини вайрон қилиш иши бўйича бўлиб ўтмоқда.

29 ноябрь куни Саакашвилини қўллаб-қувватлаш учун Тбилиси шаҳар суди биноси олдига юзлаб намойишчилар йиғилган. Саакашвилиинг тарафдорлари суд биноси олдидаги йўлнинг икки томонини тўсиб қўйган. Агмашенебели проспектида ҳам ҳаракатланиш чекланган.

Тартибсизликлар бошлангач, полиция намойишчиларни ҳудудни тарк этишга мажбур қилган, шундан сўнг улар Агмашенебели проспектига кўчган. Полиция намойишчиларга қарши кўзни ёшлатувчи газ ишлатган. Бир неча киши жароҳатланган.

Шунингдек, полиция Тбилисининг собиқ мери Гиги Угулавани суд бўлиб ўтаётган бино ташқарисида ҳуқуқ-тартибот идоралари ходимларига бўйсунмагани учун ҳибсга олгани хабар қилинган.

Саакашвили 1 октябрь куни Грузияда ҳибсга олинганидан сўнг очлик эълон қилганди. У 8 йиллик муҳожирликдан кейин ватанига қайтиб келиши биланоқ қўлга олинган. 10 ноябрь куни Тбилисида Саакашвили устидан суд жараёни бошланганди. Бироқ Грузиянинг собиқ президенти хавфсизлик нуқтаи назаридан судга келтирилмаган, шундан сўнг унинг адвокати жараёнда иштирок этишдан бош тортган ва учрашувни бошқа муддатга қолдиришга тўғри келган.