Ukraina prezidenti Vladimir Zelenskiyning qo‘lida mamlakatda 1—2-dekabr kunlari davlat to‘ntarishi o‘tkazish rejalashtirilayotgani haqida ma’lumotlar bor. Kiyevdagi press-marafonda Zelenskiy shunday bayonot berdi.
“Menda birinchi (dekabr) kuni davlatimizda davlat to‘ntarishi bo‘lishi haqida ma’lumot bor. Menimcha, bu qiziq axborot”, — dedi Zelenskiy.
Ukraina rahbarining so‘zlariga ko‘ra, unda razvedka ma’lumotlari, jumladan, “Rossiya vakillari bilan ukrainalik ishbilarmon Rinat Axmetovning Ukrainadagi milliard dollar jalb etadigan davlat to‘ntarishida ishtirok etishni muhokama qilayotgani” tushirilgan audioyozuvlar mavjud.
Zelenskiyning fikricha, Axmetov shu tariqa “Ukraina davlatiga qarshi urushga tortilmoqda”. Davlat rahbari uni suhbat uchun ofisiga taklif qildi.
Rossiya prezidenti matbuot kotibi Dmitriy Peskov Zelenskiyning Moskva Ukrainadagi davlat to‘ntarishini rejalashtirishga aloqadorligi haqidagi so‘zlariga izoh berar ekan, Rossiya “hech qachon bunday masalalar bilan shug‘ullanmasligini” aytdi.
Rinat Axmetov — Ukrainadagi eng boy odam. Kuzda u Zelenskiy bilan ochiqdan ochiq mojaro boshladi, oligarxning nazorati ostidagi ommaviy axborot vositalari prezidentning harakatlarini faol tanqid qilmoqda.
Avvalroq Bloomberg agentligi manbalariga tayanib, Rossiya Ukrainaga 100 ming askar ishtirokida keng ko‘lamli urush ochishga tayyorlanayotganini yozgandi. Kreml bosqinchilikka tayyorgarlik haqidagi xabarlarni quruq gap deb atadi va aksincha G‘arb kuchlarining, jumladan, NATO samolyotlarining razvedka harakatlari faollashgani munosabati bilan Moskva “hushyor bo‘lishi” kerakligini ta’kidladi.
Rossiya rasmiylari Rossiya hech kimga tahdid qilmasligini va hech kimga xavf solmasligini bir necha bor ta’kidlagan. Rossiya prezidentining matbuot kotibi Dmitriy Peskov qo‘shinlarning mamlakat hududi bo‘ylab harakatlanishi davlatning ichki ishi ekanini bildirgan.
Mavzuga doir:
Izoh (0)