Sadir Japarov Qirg‘iziston prezidenti saylovida salkam 80 foiz ovoz oldi. U uch oy avval qamoqda o‘tirgan edi

Qirg‘iziston prezidenti saylovida Sadir Japarov g‘alaba qozonmoqda. Bu ma’lumot mamlakat Markaziy saylov komissiyasi tomonidan keltirilmoqda.

Saylov uchastkalarining 96 foizidagi byulletenlar hisob-kitob qilinganida, Japarov 79,25 foiz ovoz olgani ma’lum bo‘lgan. Uning eng yaqin ta’qibchisi Adaxon Madumarov 7 foizdan kamroq ovoz to‘plagan.

Prezident saylovi bilan birga mamlakatda boshqaruv shaklini o‘zgartirish bo‘yicha ham referendum o‘tkazilgan. Referendum ishtirokchilarining 80 foizdan ortig‘i prezidentlik respublikasi uchun ovoz bergan.

Qirg‘izistondagi prezident saylovi muddatidan avval o‘tkazildi – bu saylovning o‘tkazilishi 2020-yil oktabrida, parlament saylovlaridagi ehtimoliy qoidabuzarliklar sabab boshlangan tartibsizliklar sabab avvalgi davlat rahbari So‘ronboy Jeenbekov iste’fo bergach e’lon qilingan edi.

Sadir Japarov oktabrdagi to‘polonlarga qadar tartibsizliklar keltirib chiqarishda ayblanib, 10 yillik ozodlikdan mahrum qilish jazosini o‘tayotgan edi. Namoyishchilar bosimi ostida u qamoqdan ozod qilindi, ertasiga esa parlament tomonidan bosh vazir etib tayinlandi. Jeenbekovning iste’fosidan keyin esa u prezident vazifasini bajaruvchiga aylangan edi.