Россиянинг Кемерово вилоятидаги «Листвяжная» кўмир конида ёнғин чиқди. Унинг оқибатида тарқалган заҳарли тутун 11 кишининг ҳаётига зомин бўлди. Бу ҳақда Кемерово вилояти губернатори Сергей Сивилевга таяниб, «РБК» хабар берди.
«Ҳозирда яна бир қурбон ҳақида маълум бўлди. Ҳалок бўлганлар сони 11 кишига етди», — деб ёзган губернатор Telegram-каналида.
Сергей Сивилевнинг сўзларига кўра, шахтада қолиб кетган кончилар иккита узоқ масофадаги штрекда (ер юзасига бевосита олиб чиқадиган йўлаги йўқ кон иншооти) бўлиши мумкин, улар билан ҳозирча алоқа йўқ.
Россия фавқулодда вазиятлар вазири вазифасини бажарувчи Александр Чуприяннинг «РБК»га айтишича, қутқарувчилар барча ишларни амалга ошириш учун тутунли ҳудудда 7-8 км масофани босиб ўтиши керак. «Бу ҳар тарафга тарвақайлаб кетган тармоқ, ҳозирда 11 та бўлим шу билан шуғулланмоқда, афсуски, аллақачон жасадлар ҳам топилди», — дея қўшимча қилди у.
Сивилевнинг қўшимча қилишича, аварияда жароҳат олганларнинг 43 нафари Кончилар саломатлигини сақлаш марказига ётқизилган. Улардан тўрт нафарининг аҳволи оғир, деди у. Фавқулодда вазиятлар вазирлиги маълумотларига кўра эса жабрланганлар сони 45 нафар.
Минтақа раҳбари вилоят ҳукумати барча ёрдам дастурларини тайёрлаб қўйганини қўшимча қилди. Кончиларнинг ҳаммаси топилиши билан уларнинг яқинларига хабар берилади.
Вилоятнинг Беловский шаҳар округидаги «Листвяжная» конидаги ёнғин маҳаллий вақт билан соат 08:51 да (Тошкент вақти билан 06:51) 250 метр чуқурликда содир бўлган, ҳозирда шахтадаги ишлар тўхтатилган.
Кўмир шахтасида ёнғин чиқиши бўйича вилоят Тергов бошқармаси Жиноят кодексининг 2-қисми, 217-моддаси (хавфли ишлаб чиқариш объектларидаги саноат хавфсизлиги бузилишининг инсон ўлимига олиб келиши) бўйича жиноий иш очди.
Ҳозирда қутқарув ишлари олиб борилмоқда, воқеа жойида тергов гуруҳи ҳам ишламоқда. ФВВ раҳбари вазифасини бажарувчи Александр Чуприян, ҳодиса жойига учиб келган соғлиқни сақлаш вазири Михаил Мурашко кондаги авария оқибатида жабрланганларга тиббий ёрдам кўрсатишни назоратга олган.
Изоҳ (0)