Qirg‘iziston poytaxti Bishkek shahrida mamlakat parlamentiga bo‘lib o‘tgan saylovlar natijalaridan norozi bo‘lgan minglab odamlar ko‘chalarga norozilik namoyishi uchun chiqdi. Militsiya xodimlari namoyishchilarni suv zambaraklari hamda yorug‘lik va shovqin chiqaruvchi granatalar yordamida tarqatib yubordi. Bu haqda Meduza xabar berdi.

Foto: “TASS”

Namoyish 5-oktabr kuni kunduzi boshlangan, unda qatnashganlar soni olti ming kishiga yetgan. Namoyishni parlamentda deputatlik o‘rniga ega bo‘la olmagan 11 ta partiya qo‘llab-quvvatlagan. Namoyishning dastlabki soatlarida militsiya kuch ishlatmagan va yig‘ilganlarni tarqalishga chaqirgan.

Namoyishchilar hukumat binosi tomon harakatlanib, qarorgoh darvozasini sindirgan va uning hududiga kirishga uringan. Shundan so‘ng namoyishchilarni tarqatish harakati boshlangan. Kuch tuzilmalari maxsus texnika hamda yorug‘lik va shovqin chiqaruvchi granatalardan, suv zambaraklaridan foydalangan. Namoyishchilar ularga qarata tosh otgan.

Foto: “TASS”

Foto: “TASS”

To‘qnashuvlar oqibatida namoyishning bir nechta ishtirokchisi jarohat olgan. Ular orasida “Ata Meken” partiyasi yetakchisi Janar Akayev ham bor, u oyog‘idan jarohat olgan. Qirg‘iziston Ichki ishlar vazirligi ikki nafar militsiya xodimi jarohat olganini ma’lum qilgan. Namoyishchilar chiqindi idishlarini ag‘darib, ularni yoqib yuborgan. Shahar markazida bir nechta avtomobilga zarar yetkazilgan.

Hukumat binosi oldidagi namoyishchilar to‘liq tarqatilgan. Ularning katta qismi qo‘shni ko‘chalarda qayta to‘plangan. Militsiya namoyishchilarni haydash bilan birga, uning qatnashchilarini qo‘lga olishni ham boshlagan.

Eslatib o‘tamiz, Qirg‘izistonda parlament saylovi 4-oktabr kuni bo‘lib o‘tdi. Dastlabki ma’lumotlarga ko‘ra, parlamentda deputatlik o‘rniga ega bo‘lish uchun zarur bo‘lgan yetti foizlik dovondan to‘rtta partiya o‘ta olgan. Bunda parlamentdagi o‘rinlarning yarmini umumiy hisobda “Birimdik” va “Mekenim Qirg‘iziston” partiyalari egallagan. Qayd etilishicha, “Birimdik” partiyasi prezident So‘ronboy Jeenbekov oilasi bilan yaqin aloqalarga ega, ikkinchi partiya esa Qirg‘izistondagi  eng nufuzli kishilardan hisoblanadigan aka-uka Matraimovlar bilan bog‘liq.