Беларусда Ироққа қайтишни истамаган муҳожирлар митинг уюштириб, уларни Европа Иттифоқига киритишни талаб қилди (видео)

Беларуснинг Брузги логистика марказида Ироққа қайтишни истамаётган муҳожирлар митинг уюштирди. Улар ўзларини Европа Иттифоқига киритишни талаб қилмоқда. Воқеа жойидан олинган видеолар ATN NEWS Telegram каналида эълон қилинган.

Кадрлардан кўриниб турибдики, бир неча ўнлаб муҳожирлар инглиз тилида «биз Ироққа қайтиб бора олмаймиз» деб ёзилган плакатларни кўтариб олган. Муҳожирларнинг  журналистларга айтишича, улар Европа Иттифоқидаги исталган мамлакат — Германия, Франция, Бельгияда яшашга рози. Митинг тинч ўтган ва Беларусь—Польша чегарасига қаратилган навбатдаги ҳужумга айланиб кетмаган. Муҳожирлар турли шиорлар билан ҳайқирган. Улар ўраб қўйилган ҳудуддан четга чиқмаган.

Бундан аввал, 25 ноябрга ўтар кечаси тош ва таёқлар билан қуролланган 200 га яқин муҳожир Беларусь—Польша чегара чизиғини бузиб ўтгани ҳақида хабар берилган. Улар Польша ҳудудида ҳибсга олинган ва Беларусга қайтариб юборилган.

Эслатиб ўтамиз, Беларусь президенти Александр Лукашенко Гродно вилояти расмийларига Беларусь—Польша чегарасидаги муҳожирлар учун ётоқ ташкиллаштириш бўйича топшириқ берганди. Бошпана муҳожирлар тўпланган «Брузги—Кузница» чегара пункти яқинида логистик марказда ташкил этилган.

8 ноябрь куни эрталаб Беларусь ва Европа Иттифоқи давлатлари чегарасида вазият кескинлашди. Беларусь оммавий ахборот воситалари мамлакатнинг Польша билан чегараси томонга ҳаракатланаётган муҳожирлар карвони акс этган видеоларни эълон қилди. 11 ноябрь куни Буюк Британия, АҚШ ва Европа Иттифоқи давлатлари Беларусь ҳукуматини Польша—Беларусь чегарасидаги миграция инқирозини сунъий равишда яратганликда айблади.

Европа Иттифоқи маъмурияти муҳожирларни Польша чегарасига етказишни ташкил этишда иштирок этган барча компаниялар ва шахсларга нисбатан санкциялар қўллаш режасини эълон қилгач, бир қанча авиакомпаниялар Ироқ ва бошқа бир қатор давлатлар фуқароларини Беларусга ташишни чеклади. Жумладан, Ўзбекистон ҳудуди орқали Ироқ, Сурия, Яман, Ливан, Ливия ва Афғонистон фуқароларининг  Беларусга парвози вақтинча чекланди.

Bloomberg хабарига кўра, Европа Иттифоқи муҳожирларни Беларусь ва Польшага ташийдиган фирмаларга қарши санкциялар жорий қилмоқчи.