Франция соғлиқни сақлаш вазири Оливье Веран коронавирусдан касалланганлар сонининг кўпайиши муносабати билан янги чеклов чораларини эълон қилди. Ҳукумат мамлакатдаги пандемия билан боғлиқ вазиятни «бешинчи тўлқин» деб атамоқда.
Францияда, хусусан, ПЗР-тести натижасининг яроқлилик муддати қисқартирилди. Агар шу кунгача тестнинг натижаси салбий чиққандан сўнг 72 соат давомида жамоат жойларига бориш мумкин бўлган бўлса, энди бу муддат 24 соатгача қисқартирилди.
Бундан ташқари, жамоат жойларида ниқоб тақиш режими қайтарилмоқда. Ҳатто коронавирусга қарши эмланганлар ҳам ресторан ва театрларда ниқобда бўлиши шарт. Шу билан бирга, маҳаллий ҳокимият органлари оммавий тадбирлар, жумладан, рождество ярмаркаларида ҳам мустақил равишда чекловлар жорий этиши мумкин бўлади.
Соғлиқни сақлаш вазири, шунингдек, вакцинанинг учинчи — бустер дозасини иккинчи дозадан кейин 5 ой ўтгач олиш кераклигини айтди. Акс ҳолда, иккита доза олган одамлардаги «саломатлик паспорти» (вакцинация сертификати) ҳақиқий ҳисобланмайди.
Вераннинг ишонтириб айтишича, ҳукумат комендантлик соати ёки корхоналарни мажбурий ёпиш каби чораларни қўлламайди.
Франциянинг Пастер институти маълумотларига кўра, коронавируснинг ҳозирги тўлқини декабрь ойи бошида энг чўққига чиқади. Ўтган бир кун давомида бутун Франция бўйлаб 32 591 кишида инфекция қайд этилган. Бу апрель ўрталаридан бери энг юқори кўрсаткич. Шунингдек, сўнгги суткада COVID-19 оқибатида 80 киши ҳалок бўлган.
Охирги икки ҳафта ичида Австрия, Словакия ва Нидерландияда янги чекловлар жорий этилди. Мазкур мамлакатларда ҳам касалланишнинг жиддий ўсиши кузатилмоқда.
Жаҳон соғлиқни сақлаш ташкилотининг огоҳлантиришича, Европада агар шошилинч чеклов чоралари кўрилмаса, 2022 йилнинг март ойигача коронавирусдан яна 500 мингта ўлим қайд этилиши мумкин.
Изоҳ (0)