Бирлашган Миллатлар Ташкилоти (БМТ) бош котиби Антониу Гутерриш Эфиопиядаги жанговар ҳаракатларни зудлик билан тўхтатишга чақирди, деб ёзади Reuters.
Гутерриш Колумбиядаги ҳукумат ва демобилизация қилинган Инқилобий қуролли кучлар (FARC) ўртасида тузилган тинчлик келишувининг беш йиллиги муносабати билан у ерга ташриф буюрганди. Ташриф давомида у Эфиопиядаги вазиятга тўхталиб ўтди.
«Колумбиядаги тинчлик жараёни бугун мени Эфиопиядаги қарама-қарши томонларни сўзсиз ва зудлик билан ўт очишни тўхтатишга ундаш учун илҳомлантирди», — деди Гутерриш Колумбия президенти Иван Дуке билан қўшма нутқида.
БМТ бош котибининг сўзларига кўра, Эфиопияда ҳарбий ҳаракатлар тўхтатилиши эфиопияликлар ўртасида мулоқот ўрнатиш имконини беради, бу эса, ўз навбатида, мамлакатга минтақа барқарорлиги учун яна ўз ҳиссасини қўшишга имкон беради.
«Мен Эфиопия раҳбарлари Колумбиядан ўрнак олишини жуда истардим», — дея қўшимча қилди Гутерриш.
Эфиопияда қуролли тўқнашувлар 2020 йил 4 ноябрь куни ҳукумат ва мамлакатдаги ҳукмрон Тиграй сўл партиясининг «Тиграйни озод қилиш халқ фронти» (TPLF) ўртасида бошланган. Бунга Эфиопия ҳукуматининг TPLF’ни мамлакат қуролли кучлари ҳарбий базасига ҳужум уюштирганликда айблаши сабаб бўлган.
БМТ маълумотларига кўра, тўқнашувлар натижасида ўн минглаб одам Эфиопиядан Суданга қочиб кетган. Ташкилот Эфиопиянинг Тиграй ҳудуди аҳолиси сўнгги ўн йил ичидаги энг ёмон очарчилик ёқасида экани ҳақида бир неча бор хабар берган.
Аввалроқ Эфиопия бош вазири Абий Аҳмед TPLF исёнчиларига қарши курашда қўшинларни бошқаришни ўз зиммасига олаётгани хабар қилинганди. Абий Аҳмед ҳокимиятга 2018 йилда келган. Орадан бир йил ўтгач, у Эритрея билан можарони тугатишга қаратган саъй-ҳаракатлари учун тинчлик бўйича Нобель мукофотини қўлга киритган.
Ноябрь бошида Эфиопияда олти ойлик муддатга фавқулодда ҳолат эълон қилинган.