Bosh vazir Sadir Japarov boshchiligidagi Qirg‘iziston hukumati uning muddatdan avvalgi prezident saylovlarida g‘alaba qozonganidan so‘ng iste’foga chiqdi. Prezident vazifasini bajaruvchi Talant Mamitov tegishli farmonni imzoladi, deb xabar bermoqda “RBK” davlat rahbari saytidagi ma’lumotga tayanib.

Qayd etilishicha, 20-yanvar kuni bo‘lib o‘tgan prezidentlik saylovlari natijalari rasman e’lon qilingandan so‘ng Japarov bosh vazir lavozimidan ketish to‘g‘risida ariza topshirgan.

Vazirlar Mahkamasi a’zolari yangi hukumat tuzilguncha o‘z vazifalarini bajarishda davom etadi. Ungacha Qirg‘iziston bosh vazir vazifasini bajarish bosh vazir birinchi o‘rinbosari vazifasini bajaruvchi Artyom Novikovga yuklatilgan.

Qirg‘izistonda muddatdan oldin prezident saylovlari 10-yanvar kuni bo‘lib o‘tdi. Davlat rahbari lavozimiga 17 nafar nomzod davogarlik qildi. Oktabr oyidan beri hukumatni boshqargan Sadir Japarov raqiblaridan ancha ustun keldi. Ularning aksariyati 2 foizdan kam ovoz olgan.

Prezident saylovi bilan birga mamlakatda boshqaruv shaklini o‘zgartirish bo‘yicha ham referendum bo‘lib o‘tdi. Referendum ishtirokchilarining 80 foizdan ortig‘i prezidentlik respublikasi uchun ovoz berdi.

Muddatidan avvalgi prezident saylovlari 2020-yil oktabrida, parlament saylovlaridagi ehtimoliy qoidabuzarliklar sabab boshlangan tartibsizliklar tufayli avvalgi davlat rahbari So‘ronboy Jeenbekov iste’fo bergach e’lon qilingan edi.

Avvalroq Shavkat Mirziyoyev Sadir Japarovni Qirg‘izistondagi prezidentlik saylovlarida qozongan g‘alabasi bilan tabriklagani, Sadir Japarov Rossiyani Qirg‘izistonning bosh ittifoqdoshi deb atagani hamda Japarov Qirg‘izistonda rus tilining rasmiy maqomini saqlab qolishga va’da bergani haqida xabar berilgandi.