Ўзбекистон ва Қозоғистон мудофаа вазирликлари ўртасида ҳарбий соҳада ҳамкорлик бўйича қатор тадбирларни ўз ичига олган битим имзоланди. Бу ҳақда Мудофаа вазирлиги aхборот ва оммавий коммуникациялар департаменти хабар берди.
Битим Қозоғистон мудофаа вазири генерал-лейтенант Мурат Бектанов бошчилигидаги ҳарбий делегациянинг ташрифи давомида имзоланган. 22 ноябрь куни у Ўзбекистон мудофаа вазири генерал-лейтенант Баҳодир Қурбонов билан учрашган.
Мулоқот давомида қардош халқларнинг бирдамлиги, икки томонлама ҳарбий ва ҳарбий-техник ҳамкорлик масалаларининг жорий ҳолати ҳамда истиқболлари, минтақавий хавфсизлик масалалари муҳокама этилган.
Шу куннинг ўзида Қозоғистон ҳарбий делегацияси пойтахтдаги «Ғалаба боғи» ёдгорлик мажмуасида бўлиб, у ердаги «Матонат мадҳияси» мажмуаси пойига гулчамбар қўйган, боғ ичидан ўрин олган «Шон-шараф» музейидаги экспонатлар билан яқиндан танишган. Шундан сўнг делегация аъзолари Мудофаа вазирлиги «Чимён» тоғ тайёргарлиги ўқув-машқлар маркази ва Қуролли Кучлар академияси фаолиятини кўздан кечирган.
Ташриф якунида, 24 ноябрь куни икки давлат мудофаа вазирлари Жануби-ғарбий махус ҳарбий округида жойлашган «Термиз» полигонида ўтказилган «Ҳамкорлик—2021» ўзбек—қозоқ қўшма ўқувларининг асосий фазасини кузатган. У Қозоғистоннинг Жамбул вилояти «Матибулоқ» полигонида ўтказилган «Қалқон–2021» қўшма ўқувларининг давоми ҳисобланади.
Дастурга кўра ҳамкорликда ҳаракат қилган ҳарбийлар шартли равишда чегара ҳудудини бузиб киришга уринган ноқонуний қуролли гуруҳга қарши жанг олиб борган. Унда шахсий таркиб қирувчи самолётлар, жанговар вертолётлар, зирҳли техникалар, артиллерия ва учувчисиз учиш аппаратларидан кенг фойдаланган.
Эслатиб ўтамиз, шу йилнинг август ойида Ўзбекистон ҳарбийлари Россия ва Тожикистон билан машғулотларда қатнашганди. Ҳарбий машқлар «Термиз» полигонида бўлиб ўтган. Ўзбекистон, Тожикистон ва Россия Афғонистон билан чегарада ўтказган ҳарбий машғулотларда 2,5 мингдан ортиқ ҳарбий қатнашган. Машқлар пайтида Россия ва Ўзбекистон махсус кучлари ўзбек-афғон чегарасидаги шартли террорчиларни яксон қилганди.
Изоҳ (0)