Ўзбекистонда эндиликда суғурта шартномаси интернет орқали электрон шаклда тузилиши мумкин, деб хабар берди Ягона интерактив давлат хизматлари портали.
Маълум қилинишича, Шавкат Мирзиёев «Суғурта фаолияти тўғрисида»ги қонунни имзолаган. Қонунда суғурта таваккалчилиги, суғурта тарифи, франшиза, трансчегаравий суғурта ва бошқа шу каби асосий тушунчаларга таърифлар берилган.
Қонунга кўра, суғурта бозорининг профессионал иштирокчилари (суғурталовчилар, суғурта воситачилари, аджастерлар, актуарийлар, суғурта сювейерлари, ассистанс)нинг ҳуқуқ ва мажбуриятлари аниқ белгилаб қўйилган. Қонун билан суғурта қилдирувчи ва суғурталовчи ўртасида электрон шаклдаги ахборот алмашинувининг ўзига хос хусусиятлари белгиланган.
Қайд этилишича, эндиликда суғурта шартномасини интернет орқали электрон шаклда тузиш мумкин. Қонун расмий эълон қилинган кундан эътиборан уч ой ўтгач кучга киради.
Эслатиб ўтамиз, Ўзбекистонда мажбурий тиббий суғурта тизими 2021 йилдан ташкил этилиши маълум қилинганди. Бундан ташқари, Ўзбекистонда 2021 йил 1 мартдан бошлаб автомобиль эгаларини электрон суғурта қилиш амалиёти жорий этилиши хабар қилинган.
2021 йилнинг октябрь ойида эса «Суғурта бозорини рақамлаштириш ва ҳаёт суғуртаси соҳасини ривожлантириш бўйича қўшимча чора-тадбирлар тўғрисида»ги президент қарори қабул қилинган. Унга кўра, Ўзбекистонда 2022 йил 1 июлдан суғуртанинг барча турлари электрон шаклда амалга оширилади.
Изоҳ (0)