Тошкент вилояти Зангиота туманида таниқли компаниянинг кир ювиш кукунларини қўлбола усулда тайёрлаб сотаётган яширин цех фаолияти фош этилди, деб хабар бермоқда Иқтисодий жиноятларга қарши курашиш департаменти.
Маълум бўлишича, Бош прокуратура ҳузуридаги департаментнинг Зангиота туман бўлими томонидан The Procter & Gamble компанияси ишончли вакилининг мурожаатига асосан туман Давлат солиқ инспекцияси билан ҳамкорликда тезкор тадбир ўтказилган. Унда фуқаро Э.Т. ўзининг яшаш хонадонида яширин цех ташкил қилиб, ҳар бири 2 килограммдан қадоқланган полиэтилен қопларда Ariel, Tide, Persil ва «Миф» номли брендлар остида қалбакилаштирилган кир ювиш кукунларини ишлаб чиқараётгани аниқланган.
Қайд этилишича, хонадондан 4540 килограмм ярим тайёр маҳсулотлар, 146 дона кир ювиш кукуни, 111 дона турли бренд номлари туширилган полиэтилен пакетлар, 2 дона қадоқлаш ускунаси ва тарози ашёвий далил сифатида олинган.
Таъкидланишича, ҳолат юзасидан Жиноят кодексининг 149-моддаси (муаллифлик ёки ихтирочилик ҳуқуқларини бузиш) билан жиноят иши қўзғатилиб, тергов ҳаракатлари ўтказилмоқда.
Мавзуга доир:
- Бухорода инсон саломатлиги учун хавфли ёғ маҳсулоти ишлаб чиқариш билан шуғулланган яширин корхона аниқланди
- Бухорода қўлбола тайёрланган истеъмолга яроқсиз ёғ маҳсулотини сотаётган шахс қўлга олинди
- Божхонадан салкам 12 млрд сўмлик шиша идишлар ва кир ювиш кукунларини яширинча ўтказишга уриниш фош этилди
Изоҳ (0)