Ҳиндистон Олий суди пойтахт Нью-Деҳли раҳбариятига ҳавонинг ифлосланиши хавфли даражага етгани сабабли қаттиқ карантин жорий этишни буюрди. Бу ҳақда «Korrespondent.net» хабар берди.
Қайд этилишича, шаҳарда ҳаво сифати индекси 343 ни ташкил этади, одамлар учун эса 50 кўрсаткич хавфли ҳисобланади. Бунга ўрим-йиғимдан кейин далаларда сомонларнинг кенг кўламда ёнаётгани сабаб бўлмоқда.
Таъкидланишича, Нью-Деҳли ва шаҳар атрофидаги аҳолининг нафас олиш муаммолари билан шифокорларга мурожаат қилиши ортган. Айниқса, болалар учун тутуннинг зарари юқори.
Касалланиш ва қурбонлар кўпаймаслиги учун локдаун доирасида пойтахтдаги ишчилар ва талабалар масофавий режимга ўтиши керак. Болаларга биноларни тарк этиш тақиқланади.
Бундан ташқари, Ҳиндистон ҳукумати пойтахт ҳавосининг ифлосланишини камайтириш учун бошқа чораларни ҳам кўрди. Хусусан, Нью-Деҳли яқинидаги 11 та кўмир электр станциясидан олтитасининг ишини ой охиригача тўхтатиб туришга қарор қилинди.
Электр энергияси тақчиллиги юзага келган тақдирда, у шаҳардан 300 километр рadius ташқарида жойлашган электр станциялари томонидан таъминланади.
Эслатиб ўтамиз, 4 ноябрь куни Тошкентда чанг миқдори рухсат этилган меъёрдан 5 баробарга, кейинроқ 30 баробаргача кўтарилганди ва пойтахт ҳавонинг ифлосланиш даражаси бўйича дунёда биринчи ўринга чиқди. 8 ноябрь куни Тошкент ҳавосидаги чанг миқдори нормал кўрсаткичга қайтди.
Мавзуга доир:
- Дунё аҳолисининг қарийб ярми ифлос ҳаводан нафас олади
- ЖССТ 15 йил ичида биринчи марта ҳаво сифати бўйича тавсияларини кучайтирди. Ҳаво ифлосланишидан йилига 7 млн киши вафот этади. Бу чекиш оқибатидаги ўлим даражасига яқиндир
- Австралия пойтахтида ҳавонинг ифлосланиш даражаси ўрмон ёнғинлари туфайли меъёрдан 26 бараварга ошиб кетди
Изоҳ (0)