Байден АҚШнинг Пекин Олимпиадасини бойкот қилиши эҳтимоли ҳақидаги саволга жавоб берди

АҚШ президенти Жо Байден АҚШ Хитой билан зиддиятига қарамай Пекин Олимпиадасига делегация юбориши ёки йўқлиги ҳақида журналистларнинг саволига жавоб берди. Байден нутқининг стенограммаси Оқ уй сайтига жойлаштирилган.

«Мен делегацияман ва мен буни ҳал қилганман (I’m the delegation, and I dealt with it)», — деди Байден. У ўз баёнотининг маъносини тушунтирмаган.

Бунгача Хитой билан муносабатлардаги асосий муаммолар ва хусусан, Тайван атрофидаги вазият ҳақида гапирар экан, Байден Қўшма Штатлар Пекинга нисбатан сиёсатини ҳеч қандай тарзда ўзгартириш ва «қоидалар»ни бузиш ниятида эмаслигини айтди.

16 ноябрь куни Washington Post газетаси бир нечта манбаларга таяниб, Байден маъмурияти яқин орада 2022 йилги Пекин Олимпиадасига дипломатик бойкот эълон қилмоқчилиги ҳақида хабар берганди. Бу на президент, на АҚШ ҳукуматининг бошқа бирорта амалдори Пекиндаги Олимпиада ўйинларида иштирок этмаслигини англатади. Маъмурият манбаларига кўра, Байден мазкур қарорни ой охиригача тасдиқлаши кутилмоқда.

Пекин ва Вашингтон ўртасидаги муносабатларнинг сўнгги кескинлашуви Хитой қўшинларининг Тайван бўғозидаги фаоллиги ортгани билан боғлиқ. Октябрь ойи бошида Тайван Мудофаа вазирлиги Хитой самолётлари томонидан чегарани кесиб ўтиш ҳолатлари рекорд даражада қайд этилгани ҳақида хабар берган. Шундан сўнг, Байден Хитой томонидан тажовуз содир бўлган тақдирда Қўшма Штатлар Тайванни қўллаб-қувватлашга тайёрми ёки йўқми, деган саволга ижобий жавоб берган, бироқ у «ягона Хитой» тамойилини қўллаб-қувватлашини ҳам айтган.

Ўз навбатида Хитой раиси Си Цзиньпиннинг таъкидлашича, мамлакатлар Ҳинд—Тинч океани минтақасидаги мавжуд кескинликлар Совуқ уруш менталитетининг қайталанишига олиб келмаслиги учун барча саъй-ҳаракатларини ишга солиши керак. Унга кўра, минтақада чегараларни мафкуравий ёки геосиёсий йўналишлар бўйича чизишга уринишлар натижа келтирмайди.

Аввалроқ Жо Байден ва Си Цзиньпин ўртасида видеоконференцалоқа учрашуви бўлиб ўтганди. Унда АҚШ—Хитой ўртасидаги рақобат, пандемия ва Тайван масалаларини муҳокама қилинган. Онлайн учрашув 3,5 соат давом этган.