Инглиз тилининг Кембриж луғатида «perseverance», яъни «қатъиятлилик»сўзини 2021 йил сўзи деб номлади. Бу ҳақда Кембриж университети веб-сайтида эълон қилинган.
Танлов луғат фойдаланувчилари томонидан қилинган. Улар «қийинчиликларга ёки кўп вақт сарфлашларга қарамай бирор нарсага эришиш ёки нимадир қилиш учун доимий интилиш»ни англатувчи «perseverance» сўзини йил давомида энг кўп қидирган.
«Perseverance сўзи бу йил луғат сайтида 243 000 марта қидирилган. Бу ҳам NASA миссияси билан, ҳам пандемия билан боғлиқ бўлиши мумкин. NASA Perseverance Rover’и Марсга қўнган пайтда, 19—25 февраль кунлари сўровлар сони ортган — 30 487 та қайд этилган», — дейилади университет хабарида.
Луғатни нашр қилиш бўйича бошқарма бошлиғи Вендалин Николснинг айтишича, муҳаррирлар кўпинча илгари қулоққа кам чалинадиган айрим сўз ва атамаларга қизиқиш ортиб бораётганини қайд этади. «Perseverance инглиз тилини ўрганувчилар орасида унчалик кенг тарқалган сўз эмас», — дейди Николс хоним.
Унинг таъкидлашича, Америка марсоходининг миссияси ҳақидаги хабарлардан сўнг «қатъиятлилик» сўзи узоқ вақт давомида онлайн луғатдан тез-тез қидирилишда давом этган.
«Ҳаётимиздаги қийинчиликлар ва муаммоларга, иқлим ўзгаришига ва можароларга қарши туриш мақсадида Марсга роверни қўндириш учун қатъиятлилик талаб этилади. Биз бу боғлиқликни кўрдик ва Кембриж луғати фойдаланувчилари буни қадрлашига ишонамиз», — деди Николс.
Кембриж луғати ҳар йили фойдаланувчиларни энг кўп қизиқтирадиган сўзни аниқлайди. Унинг талқинида 2020 йилда «quarantine» (карантин), 2019 йилда эса «upcycling» (эски нарсаларни қайта ишлаш орқали янги нарсалар ишлаб чиқариш) йил сўзи бўлганди.
NASA 2020 йилнинг 30 июлида Atlas V ракета-ташувчисини Perseverance марсоходи билан коинотга учирди, 2021 йилнинг февраль ойи ўрталарида ровер Марсга қўнди. Миссиядан мақсад ҳаёт изларини қидириш, сайёра иқлимини ўрганиш, тоғ жинслари ва чўкиндилардан намуналар йиғишдир. Миссия 687 кун давом этади.
Аввалроқ Оксфорд луғати «vax» сўзини йил сўзи деб атагани, Россияда «Спутник», «Афғонистон» ва «Шимолий оқим» 2021 йилда энг кўп қўлланган сўзлар деб топилгани ҳақида хабар берилганди.
Изоҳ (0)