Африка ғарбидаги Буркина-Фасо давлатида жангариларнинг полиция постига ҳужуми оқибатида 53 киши ҳалок бўлди. Бу ҳақда ҳукуматнинг расмий вакили Уссени Тамбурага таяниб, «Korrespondent.net» хабар берди.
Аввалроқ ҳужум оқибатида 19 киши ҳалок бўлгани айтилган эди. Таъкидланишича, қурбонлар орасида тўрт нафар тинч аҳоли вакили ҳам бор.
Расмийларнинг маълумотларига кўра, қурбонлар бундан ҳам кўп бўлиши мумкин эди — 46 нафар ҳарбий полициячи омон қолишга муваффақ бўлган.
Содир бўлган ҳолат бўйича биринчи округ командири ва Шимолий сектор гуруҳи командири лавозимларидан олинган. Ҳалок бўлганлар хотирасига 16 ноябрь куни мамлакатда уч кунлик умуммиллий мотам эълон қилинган.
Таъкидлаш керакки, ҳужум содир бўлган Буркина-Фасонинг шимолида иккита террорчилик гуруҳи мавжуд — ИШИД ва Ансар ул-Ислом. 2018 йилда минглаб тинч аҳоли террорчилар қурбонига айланган, яна 1,5 миллион фуқаро ўз уйларини тарк этишга мажбур бўлган.
Аввалроқ Нигерда қуролли жангарилар 70 га яқин кишини ўлдиргани, Эфиопияда олти ойлик муддатга фавқулодда ҳолат эълон қилингани, Нигерияда қуролли шахсларнинг масжидга қилган ҳужуми оқибатида 18 киши ҳалок бўлгани тўғрисида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)