Германия канцлери вазифасини бажарувчи Ангела Меркель лавозимини тарк этганидан сўнг унинг офиси тўққиз кишигача кенгаймоқда, улар бюджетдан маош олади. Бу ҳақда Der Spiegel журнали Германия Молия вазирлиги мактубига таяниб хабар берди.
Меркель офис раҳбари ва унинг ўринбосарини 10 412 евро маош билан таъминлайди. Бундан ташқари, бюрода икки котиб, икки реферант, бир нафар офис ходими ва икки ҳайдовчи иш бошлайди. Уларни сақлаб туриш Германия Мудофаа вазирлигидаги лавозимларини бекор қилиш ҳисобига амалга оширилади.
Нашрнинг қайд этишича, Германия собиқ канцлери ва президентлари идораларининг ишини таъминлаш кўп маротаба танқид қилинган. 2019 йилда Бундестагнинг Бюджет қўмитаси бундай идоралардаги ходимлар сонини беш нафаргача чеклаш, шунингдек, уларнинг иш ҳақи даражасини камайтириш учун овоз берган.
Меркелнинг офисини ташкил этиш режалари ҳам танқидларга сабаб бўлди. «Меркель хоним ҳар доим камтарин канцлер сифатида тасвирланган. Якунда ҳам шундай бўлиши аниқ. Бўлажак офисингизнинг ҳашаматли муҳити сизни гўёки канцлернинг соя идорасини очмоқчилигингиз ҳақида тассурот уйғотади. Молия вазирлигининг котиби Олаф Шолс шубҳасиз, олдингизда қарздор. Бу ҳаддан ошиб кетишларнинг бошқа изоҳи йўқ», — деди сўл партия раҳбари ўринбосари Гезине Лётч.
Меркель 2005 йилдан бери (тўрт муддат) Германия канцлери бўлган, шунингдек, Христиан-Демократик Иттифоқига (ХДИ) раислик қилган. У 2018 йилда кейинги муддати тугагач канцлерлик лавозимидан кетишини эълон қилганди.
27 сентябрь куни бўлиб ўтган Германиядаги парламент сайловларида амалдаги молия вазири Олаф Шолс раҳбарлигидаги Социал-демократик партия (ГСДП) ғалаба қозонди. Унга сайловчиларнинг 25,7 фоизи овоз берди, ушбу натижага мувофиқ у янги Бундестагда 206 та ўринга эга бўлади.
26 октябрь куни Германия президенти Франк-Валтер Штайнмаер Меркелга ҳукумат раҳбари сифатидаги муддати расман тугагани тўғрисидаги мактубни топширди. У янги Вазирлар Маҳкамаси шакллангунга қадар канцлер лавозимида ишлаб туради.
Изоҳ (0)