Муҳаммадқодир Абдуллаевдан Баҳодир Жалоловгача. Жаҳон чемпионига айланган ўзбекистонлик боксчилар

1974 йилдан бошлаб ҳар икки йилда бир ўтказилиб келинаётган ҳаваскор бокс бўйича Жаҳон чемпионатида Ўзбекистон делегацияси 1993 йилдан буён иштирок этиб келмоқда. Шу вақтга қадар бокс бўйича Жаҳон Чемпионатида ўзбекистонликлар 9 та олтин медални қўлга киритган. «Дарё» Жаҳон чемпионатларида Ўзбекистон учун олтин медални олиб келган боксчиларни ёдга олади.

Муҳаммадқодир Абдуллаев (1999 йил)

Муҳаммадқодир Абдуллаев АҚШнинг Ҳюстон штатида бўлиб ўтган мусобақада -63,5 кг вазн тоифасида иштирок этган.

15-нояб куни 48 ёшни қарши олган Абдуллаев 1999 йилги турнирнинг 1/16 финалида россиялик Айдин Гасановни мағлуб этади, 1/8 финалда америкалик Рикардо Уильямс, чорак финалда беларуслик Сергей Биковский устидан ғалаба қозонади. Муҳаммадқодир ярим финалда чехиялик Лукаш Koneчнини 12:2 ҳисобида мағлуб этади. Финалда эса франциялик Вилли Блейн 11:6 ҳисобида таслим этилади. Шу тариқа Муҳаммадқодир Ўзбекистон учун расмий биринчи олтин медални тақдим этган.

Ўткирбек Ҳайдаров (1999)

Андижонлик боксчи 1999 йилги Жаҳон чемпионатида -75 кг вазн тоифасида иштирок этган. Ўткирбек венгриялик Жим Родригес, италиялик Салваторе Мунно, россиялик Евгений Казансев каби рақибларни енгиб, финалга чиққан. Ҳайдаров финалда руминиялик Адриан Диакону устидан 6:1 ҳисобида ғалаба қозониб, олтин медал соҳибига айланади.

Руслан Чагаев (2001)

1997 йилда Венгриянинг Будапешт шаҳри мезбонлик қилган Жаҳон чемпионатида Руслан Чагаев Ўзбекистон учун илк олтин медални тақдим этган. Чагаев -91 кг вазн тоифасида иштирок этган ва дастлабки жангда беларуслик Сергей Дичков устидан ғалаба қозонган. Чорак финалда италиялик Жиакоббе Фрагомени, ярим финалда германиялик Маик Ҳанкени таслим этиб, финалга чиққан. Финал босқичида Чагаев Куба вакили Феликс Савонни 14:4 ҳисобида мағлуб этиб, олтин медалга эга чиққан.

Аммо AIBA Русланни олтин медалдан маҳрум этади. Чунки спортчи Жаҳон чемпионатига қадар профессионал боксда иккита жанг ўтказган эди. Кейинчалик ушбу жанглар кўргазмали эканлиги исботлангач, Русланнинг ҳаваскор боксдаги фаолияти тикланган, аммо медал қайтариб берилмаган.

2001 йил Шимолий Ирландиянинг Белфаст шаҳрида ўтказилган Жаҳон чемпионатида ҳам Руслан Чагаев олтин медал соҳибига айланади. Чагаев қозоғистонлик Рустам Ругебаев, венгриялик Куртузса Скаба ва германиялик Виталий Бут устидан ғалаба қозониб, финалга чиқади. Финалдаги рақиби украиналик Алексей Мазикинни таслим этиб, чемпионга айланган.

Аббос Атоев (2007, 2009)

Аббос Атоев 2007 йилда АҚШнинг Чикаго штатида бўлиб ўтган Жаҳон чемпионатида -81 кг вазн тоифасида иштирок этди. Атоев финалга қадар руминиялик Константин Беженару, франциялик Мамаду Диамбанг, хорватиялик Марио Сиволиха ва қозоғистонлик Еркебулан Шиналиевларни мағлуб этган. Финалда Аббос Атоев россиялик Артур Бетербиевни 20:17 ҳисобида мағлубиятга учратиб, олтин медалга эга чиққан.

2009 йилда Италиянинг Милан шаҳрида бўлиб ўтган мусобақада Аббос -75 кг вазн тоифасида иштирок этди. Ушбу мусобақада Атоев 1/16 финалда япониялик Кентаро Ҳаяшини мағлуб этади. 1/8 финалда бразилиялик Ямагучи Фалкао таслим этилади. Чорак финалда германиялик Константин Буга устидан ғалаба қозонади. Ярим финалда ҳиндистонлик Вижиндр Сингҳ 7:3 ҳисобида мағлуб этилади. Финалда Аббос Атоев арманистонлик Андраник Ҳакобян билан жанг қилди ва 9:0 ҳисобида ғалаба қозонди. Шу тариқа Атоев кетма-кет иккинчи марта олтин медални қўлга киритди.

Шаҳрам Ғиёсов (2017)

Шаҳрам Ғиёсов 2017 йил Германиянинг Гамбург шаҳрида ўтказилган Жаҳон чемпионатида -69 кг вазн тоифасида иштирок этган.

1/8 финалда украиналик Евгений Барабановни 5:0 ҳисобида таслим этган. Чорак финалда эса англиялик Пет Маккормак ҳам 5:0 ҳисобида мағлуб этилади. Ярим финалда Шаҳрам қозоғистонлик Аблайхан Жусупов билан тўқнаш келган ва 4:1 ҳисобида ғалаба қозонган. Финалда Ғиёсов кубалик Рониэл Иглесиасга ҳеч қандай имкон қолдирмаган ва олтин медални қўлга киритган.

Шаҳобиддин Зоиров (2019)

2019 йил Россиянинг Екатеринбург шаҳрида бўлиб ўтган бокс бўйича Жаҳон чемпионатида Шаҳобиддин Зоиров -52 кг вазн тоифасида иштирок этган.

Ўзбекистонлик боксчи дастлабки жангини туркманистонлик Ихлос Гулижановга қарши ўтказган. Зоиров барча ҳакамлар қарорига кўра ғолиб бўлган. Иккинчи жангда Шаҳобиддинга Доминикан республикаси вакили Родриго Мартега рақиблик қилди. Ушбу жангда ҳам Зоиров катта устунлик билан ғалаба қозонган. Нимчорак финалда Зоиров қирғизистонлик Азат Усеналиевни мағлуб этиб, чорак финал иштирокчисига айланган. Чорак финалда болгариялик Даниэль Асенов устидан ғалаба қозонган Шаҳобиддин ярим финалда франциялик Билал Беннамани мағлубиятга учратган.

Финал босқичида Шаҳобиддин Зоиров Ҳиндистон вакили Амит Пангал устидан 5:0 ҳисобида ғалаба қозониб, Ўзбекистон учун 7-олтин медални қўлга киритган.

Миразизбек Мирзахалилов (2019)

Миразизбек Мирзахалилов 2019 йилги Жаҳон чемпионатида -57 кг вазн тоифасида иштирок этган.

Мирзахалилов 1/16 финал босқичида бразилиялик Дуглас де Андраде устидан 5:0 ҳисобида ғалаба қозонган. Нимчорак финалда эса марокашлик Муҳаммад Ҳамуд 4:1 ҳисобида таслим этилган. Чорак финалда қозоғистонлик Кайрат Эралиев, ярим финалда мўғулистонлик Эрденебатин Сендбаатарни мағлуб этган Миразизбек финалда кубалик Лазаро Альваресга қарши жанг қилади. Ҳал қилувчи жангда Мирзахалилов рақибини енгиб, олтин медалга эга чиққанди.

Баҳодир Жалолов (2019)

+91 кг вазн тоифаси вакили Баҳодир Жалолов Екатеринбургдаги дастлабки жангида украиналик Сонте Рогавага қарши рингга кўтарилиб, рақиби устидан ғалабага эришган. Жалоловга чорак финалда америкалик Ричард Торрес тўқнаш келган. Баҳодир 1-раунддаёқ рақибини чуқур нокаут ҳолатига тушириб  ярим финал йўлланмасини қўлга киритган эди. Ярим финалда Баҳодир россиялик Максим Бабанин устидан 5:0 ҳисобида ғалаба қозонган. Финалда эса Жалолов азалий рақиби қозоғистонлик Камшибек Конкабаевга қарши рингга чиқиб, учала раундда ҳам рақибидан устун келган ва ғалабага эришган.