Ўзбекистон миллий терма жамоаси 15 ноябрь куни Гори шаҳрида Грузия терма жамоасига қарши ўртоқлик ўйинида иштирок этади. Учрашув Тошкент вақти билан 19:00 да старт олади.
Ўзбекистон
Вадим Абрамов қўл остидаги жамоа ЖЧ—2022 саралашининг иккинчи босқичида муваффақиятсизликка учрагач, жамоа бошқарувида ўзгариш кузатилди. Абрамов ўрнини Сречко Катанец эгаллади. «Оқ бўрилар» словениялик мутахассис бошчилигида учта ўртоқлик ўйини ўтказишга улгурди.Сентябрь ойида Швецияга қарши ўйинда (1:2) мағлубият қабул қилиб олинди. Октябрь ойида Малайзия терма жамоаси 5:1 ҳисобида таслим этилди. Ўзбекистон бир неча кундан кейин Иордания билан ўртоқлик ўйини ўтказиб, кутилмаганда 0:3 ҳисобида таслим бўлди.
Катанец Грузия йиғинига номдор футболчилар қатори кўплаб янги номларни жалб қилган. Ноябрь ойидаги йиғинга «Насаф» футболчилар чақирилмади. Жасур Яхшибоев, Ҳожиакбар Алижонов, Достон Турсунов жароҳат сабаб, Шаҳбоз Умаров коронавирус туфайли, Рустам Ашурматов эса виза билан боғлиқ муаммо эвазига Грузияга бора олмаган.
Грузия
Грузия терма жамоаси ЖЧ—2022 саралашида Европа минтақасининг B гуруҳида иштирок этди. Жамоа 7 очко тўплаб, бешта жамоа ичида 4-ўринни эгаллади.Қайд этиш керак, айни вақтда Вилли Саньол шогирдлари кўтаринки кайфиятда. Октябрда жамоа Косовани мағлуб этиб (1:2), беш ўйиндан иборат мағлубиятли сериясига якун ясаган бўлса, 11 ноябрь куни Швеция устидан сенсацион ғалабани (2:0) қўлга киритди. Сўнгги учрашувда «Рубин» юлдузи Хвича Кварацхелия дублга эришди.
Бу иккинчи тўқнашув бўлади
Жамоалар шу вақтга қадар фақат бир марта ўзаро тўқнаш келган. 2017 йилнинг январида бўлиб ўтган ўртоқлик ўйинида 2:2 ҳисоби қайд этилган. Ўзбекистон сафида Элдор Шомуродов дубль қайд этганди.
Вилли Саньол Ўзбекистонга қарши ўйинда иккинчи таркибни тушириш нияти йўқлигини билдирди. Катанец ҳам катта эҳтимол билан илк дақиқалардан етакчи ўйинчиларини майдонга ташлайди.
Ўйинолди фикрлари
Шубҳасиз, кетма-кет учинчи ғалаба билан йилни якунлаш ниятидамиз. Жамоа яна бир бор руҳият ва интизом намойиш қилишини хоҳлайман. Ўзбекистонга қарши ўйиндан кейин биз тўрт ой йиғилмаймиз. Шу боис ушбу учрашувда қониқарли натижа қайд этиш лозим.Вилли Саньол, Грузия бош мураббийи
Грузия терма жамоа Европа ҳаракат қилади. Рақиб жамоа кучли ва яхши ўйинчиларга эга. Бу биз учун фойдали ўйин бўлади. Терма жамоада кайфият яхши, йигитлар билан анча чиқишиб олдик.Элдор Шомуродов, Ўзбекистон терма жамоаси ҳужумчиси
Изоҳ (0)