Хитой ҳукумати таълим компанияларига пулли репетиторлик хизматларини кўрсатиш имконини тақдим қилувчи лицензиялар беришни режалаштирмоқда. Бу ҳақда The Wall Street Journal манбаларга таяниб хабар берди.
Хабарга кўра, бундай компаниялар 9-синфгача бўлган мактаб ўқувчилари учун бепул дарсларни таъминлаши лозим. Бунинг эвазига улар бошқа хизматлар — масалан, касбий имтиҳонларга тайёрланаётган катталар учун репетиторлик қилиб пул ишлаши мумкин бўлади.
Нашрга бир нечта манбаларнинг айтишича, ҳукумат битта дарс учун нарх чегарасини ҳам белгиламоқчи. Лицензия олиш учун компания мактабдан ташқари машғулотлардан олинадиган даромадларни йиғадиган нотижорат фондини яратиши зарур бўлади.
Мазкур қарор ҳақида расмийлар ноябрь ойида эълон қилмоқчи, дейилади WSJ хабарида. Лицензиялар айнан кимларга берилиши ҳозирча номаълум, аммо Гаоту ва Юаньфудао таълим компаниялари ҳукумат билан музокаралар олиб бормоқда, дейди манбалар.
2021 йилнинг июль ойида Хитой ҳукумати мактаб дастурларини ўргатувчи компанияларга фойда олиш, чет эл сармоясини жалб қилиш ёки биржага чиқишни тақиқлаган эди. Сервислардан нотижорат ташкилот сифатида рўйхатдан ўтиш талаб қилинган. Ўшанда онлайн репетиторлик сервисларининг акциялари бир кунда 54-98 фоизга тушиб кетган.
Изоҳ (0)