Xitoyning Szyansu provinsiyasida kollej talabalari namoyish o‘tkazib, ta’lim muassasasining direktorini 30 soat davomida garovda ushlab turdi. Namoyishchilarni politsiya maxsus vositalardan foydalangan holda tarqatib yubordi, deb yozmoqda BBC.
Foto: bbc.com
Xabarga ko‘ra, Nankin kollejini unchalik nufuzli bo‘lmagan kasb-hunar muassasasi bilan birlashtirish rejasi namoyishlarga sabab bo‘ldi.
Hattoki rasmiylar ta’lim muassasalarining birlashtirilishi bekor qilinganini aytganidan keyin ham talabalar shovqin ko‘tarishda davom etdi va 55 yoshli kollej direktorining ketishiga yo‘l qo‘ymadi.
Namoyishchilar o‘zlarining diplomlari mehnat bozorida qadrsizlanib qolishidan xavotir olib, mana shunday keskin choralar ko‘rgan.
Huquq-tartibot organlari namoyishga chiqqan talabalarni dubinka va qalampir purkagich bilan tarqatib yubordi. Talabalar orasida jarohatlanganlar ham bor.
