Xitoy hukumati ta’lim kompaniyalariga pulli repetitorlik xizmatlarini ko‘rsatish imkonini taqdim qiluvchi litsenziyalar berishni rejalashtirmoqda. Bu haqda The Wall Street Journal manbalarga tayanib xabar berdi.
Xabarga ko‘ra, bunday kompaniyalar 9-sinfgacha bo‘lgan maktab o‘quvchilari uchun bepul darslarni ta’minlashi lozim. Buning evaziga ular boshqa xizmatlar — masalan, kasbiy imtihonlarga tayyorlanayotgan kattalar uchun repetitorlik qilib pul ishlashi mumkin bo‘ladi.
Nashrga bir nechta manbalarning aytishicha, hukumat bitta dars uchun narx chegarasini ham belgilamoqchi. Litsenziya olish uchun kompaniya maktabdan tashqari mashg‘ulotlardan olinadigan daromadlarni yig‘adigan notijorat fondini yaratishi zarur bo‘ladi.
Mazkur qaror haqida rasmiylar noyabr oyida e’lon qilmoqchi, deyiladi WSJ xabarida. Litsenziyalar aynan kimlarga berilishi hozircha noma’lum, ammo Gaotu va Yuanfudao ta’lim kompaniyalari hukumat bilan muzokaralar olib bormoqda, deydi manbalar.
2021-yilning iyul oyida Xitoy hukumati maktab dasturlarini o‘rgatuvchi kompaniyalarga foyda olish, chet el sarmoyasini jalb qilish yoki birjaga chiqishni taqiqlagan edi. Servislardan notijorat tashkilot sifatida ro‘yxatdan o‘tish talab qilingan. O‘shanda onlayn repetitorlik servislarining aksiyalari bir kunda 54-98 foizga tushib ketgan.
Izoh (0)