АҚШ Ички хавфсизлик вазирлиги президент Жо Байденнинг администрацияси томонидан ўтказилган тадбирлар доирасида Афғонистондан эвакуация қилинган қочоқлар иммиграцион ҳужжатларни расмийлаштиришда тўланадиган тўловлардан озод этилишини маълум қилди, деб хабар беради «ТАСС».
«Вазирлик 2021 йилнинг 30 июлидан бошлаб ўтказилган гуманитар ёрдамлар сабаб АҚШга киришига рухсат этилган Афғонистон фуқароларига иммиграцион ҳужжатларни олишда тўланадиган бождан озод этишини ва ушбу жараён соддалаштирилишини эълон қилади», — дейилади идора баёнотида.
Унда кўрсатилишича, қочоқлардан ишга жойлашишда ариза тақдим этишда, шунингдек, грин-картани — АҚШда муқим яшаш ҳуқуқини берувчи шахсни тасдиқловчи гувоҳномани олишда тўланадиган тўловлар ундирилмайди. АBC телеканалининг таъкидлашича, ҳозирда юқоридаги хизматнинг биринчиси учун 410 доллар миқдорида бож солинган, иккинчиси учун эса тўлов 1225 долларгача етиши мумкин.
The Washington Post газетасининг маълумотларига кўра, 17 августдан бошлаб Қўшма Штатларга ўз вақтида Америка қўшинларига турли ёрдамларни кўрсатган 60 мингдан ортиқ афғон эвакуация қилинган. 7 октябрь куни Пентагон АҚШ ҳукумати Афғонистондан фуқароларни эвакуация қилишни қайта йўлга қўйганини маълум қилганди.
Эслатиб ўтамиз, АҚШ ва унинг иттифоқчилари Афғонистондан қўшинларини олиб чиқа бошлагач, «Толибон» республикада кенг кўламли ҳужумлар бошлади. «Толибон» Афғонистонда кучайиб бораётганига қарамай, Жо Байден мамлакатдан қўшинларини олиб чиқиш режасини ўзгартирмаслигини маълум қилди.
15 август куни «Толибон» жангарилари Кобулга кирди ва Афғонистоннинг бутун ҳудудини назорат остига олганини эълон қилди. Шу куниёқ мамлакат президенти Ашраф Ғани истеъфога чиқиб, мамлакатни тарк этди. Афғонистон махсус кучлари тарқатиб юборилди, аҳолидан қурол-яроғлар мусодара қилинди.
Кейинроқ Байден Афғонистондаги вазият юзасидан нутқ сўзлаб, Америка қўшинларини Афғонистондан олиб чиқиш тўғрисидаги қароридан афсусланмаслигини айтди. «Биз афғонларга ўз келажагини қуриши учун ҳамма нарсани бердик. Аммо ушбу келажак учун курашиш истагини бера олмаймиз», — деди Байден.
Изоҳ (0)