Португалия полицияси Жанубий Африка Республикасидаги (ЖАР) БМТнинг тинчликпарвар кучлари жалб этилгани гумонланаётган жиноий тўдани фош этди, деб хабар беради Tengrinews.
Португалия ҳукумати БМТнинг тинчликпарвар кучлари сифатида ЖАРга жойлаштирилган қўшинлардан Африкадан ноқонуний товарлар, жумладан, олмослар, олтин, гиёҳванд моддалар ва қуролларни ташишда курьер сифатида фойдаланилгани ҳақида хабар топган. Шундан сўнг ҳарбийларга қарши ўз тарихидаги энг катта кўламли суд ишларидан бири доирасида мамлакат бўйлаб тинтув ва ҳибсларни амалга оширган.
Расмийларнинг маълум қилишича, 300 нафардан ортиқ офицер иштирокида амалга оширилган операциялар давомида ўнлаб ҳибслар амалга оширилган ва ҳарбий объектлар ҳамда уйларда 100 га яқин тинтувлар ўтказилган. Уларнинг маълум қилишича, операциянинг мақсади «халқаро алоқалардаги жиноий тармоқ» бўлган.
«Ҳозирда биз ЖАРдаги Миллий қуролли кучларда иштирок этган айрим аскарлар олмослар, олтин ва гиёҳванд моддалар савдосида курьер сифатида фойдаланилган бўлиши мумкинлигини ўрганяпмиз», — дейилади мамлакат армия штаби бошлиғининг баёнотида.
Таъкидланишича, ҳуқуқ-тартибот органларининг илк гумонлари 2019 йилда пайдо бўлган. Тергов маълумотларига кўра, тинчликпарвар кучлар Европага товарларни етказишда ЖАР ва Португалия йўналиши бўйича учган ва текширувдан ўтказилмайдиган ҳарбий самолётлардан фойдаланган. Пул ювишда эса бошқа шахслар ва сохта ҳисоб рақамлардан фойдаланилган.
Лиссабон БМТ миссиясига 2014 йилдан бери тинчликпарвар кучларини тақдим этиб келади. Португалия ташқи ишлар вазири ушбу можаро бутун португал тинчликпарварлари ва қуролли кучлари имижига салбий таъсир кўрсатмаслигига умид билдирган.
Изоҳ (0)