Xitoyda 30-avgustda voyaga yetmagan bolalar uchun yangi cheklovlar joriy etildi: endilikda ular onlayn o‘yinlarni haftasiga uch soatdan ortiq o‘ynay olmaydi. Bu haqda Xitoyning Sinxua agentligiga tayanib, IXBT xabar berdi.
Foto: IXBT
Yangi qoidalar mamlakatda o‘yinga bog‘lanib qolish xavotirlari sabab joriy etilmoqda. Shu sababli Xitoyning Tencent va NetEase o‘yin platformalari voyaga yetmaganlar uchun onlayn o‘yinlarni haftasiga uch soatgacha cheklashi kerak.
18 yoshga to‘lmagan fuqarolar endilikda haftaning juma, shanba va yakshanba kunlari soat 20:00 dan 21:00 ga qadar bir soatdan o‘ynashi mumkin. Shuningdek, ularga bayram kunlari ham bir soatdan onlayn o‘yin o‘ynashga ruxsat beriladi.
Ta’kidlanishicha, tegishli o‘yin servislari ishdan tashqari vaqtlarda onlayn o‘yinlar cheklashi, bundan tashqari, yangi qoidalar ijrosini ta’minlash maqsadida foydalanuvchilarni tekshirish tizimiga ega bo‘lishi lozim.
Eslatib o‘tamiz, Xitoyda bundan oldin ham bolalarning onlayn o‘yinlar o‘ynashiga cheklov bo‘lgan, biroq bu qadar qattiq emas edi: odatdagi kunlarda 1,5 soat, dam olish va bayram kunlari esa 3 soatdan o‘ynashga ruxsat berilgandi.
