Бухорода Жанубий Корея билан ҳамкорликда электромобиль ишлаб чиқарувчи завод йўлга қўйилиши режалаштирилмоқда
ЎзЛиДеП Бухоро шаҳар кенгаши депутати, Ideal Lift МЧЖ раҳбари Комилжон Қудратов Жанубий Кореянинг Songuo Mobility Innovation Co, LTD компания делегацияси билан учрашувда Бухорода электромобиль ишлаб чиқариш лойиҳасини йўлга қўйишни таклиф қилди. Бу ҳақда партия ахборот хизматига таяниб, Spot ёзмоқда.
Маълум бўлишича, лойиҳа қиймати 1 миллиард 210 миллион долларга тенг, йилига 30 минг дона электромобиль ишлаб чиқариш кўзда тутилган.
«Лойиҳа барча мақсадларни ўзида мужассам этган: бу ташқи бозорда республиканинг миллий манфаатларини ҳимоя қилиш, ўзбек истеъмолчиларининг манфаатларини қўллаб-қувватлаш ва янги 450 дан зиёд ишсиз аҳоли бандлигини таъминлашдир», — дея таъкидлаган Комил Қудратов.
Қайд этилишича, томонлар тайёргарлик ишларини бошлаш, жумладан, юқори технологияли ускуналар етказиб бериш, монтаж ишларини назорат қилиш ва чиқариш бўйича келишув имзолаган. Лойиҳани амалга ошириш вақти ошкор этилмаган.
Бу Ўзбекистонда электромобиль ишлаб чиқариш лойиҳасини амалга ошириш бўйича биринчи ҳаракат эмас. 2018 йилнинг май ойида «Ўзавтосаноат» махсус гуруҳи электромобиллар устида иш олиб бораётгани хабар қилинганди. Орадан бир йил ўтгач, 2019 йилнинг июнида «Ўзавтосаноат» стратегик режалаштириш дирекцияси бошлиғи Рустам Қодиров мамлакатда электромобиль ишлаб чиқаришга ҳали эрта эканини айтган. 2020 йилда Labo автомобили электромобиль сифатида харидорларга тақдим қилиниши ҳақида хабар пайдо бўлди. 2021 йилнинг март ойида эса «Ўзавтосаноат» Ўзбекистонда 2025 йилгача электромобиллар ишлаб чиқарилмаслигини маълум қилди.
Шунга қарамай, бир қатор хорижий автокомпаниялар ва маҳаллий тадбиркорлар томонидан Ўзбекистонда электромобиль заводи қуриш бўйича таклифлар берилган. Жумладан, 2019 йилда Андижонда 2 миллиард сўмлик электромобиль корхонаси қурилиши ҳақида хабар берилган. Мазкур инновацион корхона 2021 йил 1 июнда фойдаланишга топширилиши, шу асосда 10 та янги иш ўрни яратилиши айтилганди.
Шунингдек, Хитойнинг Changan Automobile Group мамлакатда электромобиллар ишлаб чиқаришни йўлга қўйиши, 2025 йилга келиб барча турдаги 21 моделдаги электромобиллар ва 12 та гибрид моделлар ишлаб чиқарилиши режалаштирилаётгани маълум қилинган.
Шавкат Мирзиёев 2019 йилда Фарғона вилоятига ташрифи давомида «Қўқон» эркин иқтисодий зонасидаги «Шаффоф омадли саноат» қўшма корхонаси фаолияти билан танишганди ва давлат раҳбарига нархи 3 минг доллар бўлган электромобиллар намуналари намойиш этилганди. Кейинчалик вилоятда электрокарлар 2022 йилдан ишлаб чиқарилиши ва бу учун завод қурилаётгани хабар қилинган. Объектни 2021 йилнинг ноябрида фойдаланишга топшириш режалаштирилганди. Ишлаб чиқариш қуввати йилига 30 мингтани ташкил этади, ишчилар ўрни — 350 та.
Бундан ташқари, Фарғонада Хитойнинг Central Asia Motors компанияси билан биргаликда электромобиллар ишлаб чиқаришни йўлга қўйиш режалаштирилаётгани, дастлабки электромобиллар 2021 йил декабрь ойида тест режимида ишлаб чиқарилиши ҳақида хабар берилган.
Шунингдек, «Қўқон» эркин иқтисодий зонасида 2022 йилдан Хитойнинг Silk Road Company компанияси билан ҳамкорликда нархи тахминан 3 минг доллар, ташқи кўриниши Mercedes AMG’ни эслатадиган электромобиллар, 2023 йилдан эса Hyundai компанияси билан ҳамкорликда Hyundai Kona электромобили ишлаб чиқарилиши бошланиши керак.
2019 йил сентябрида Хитойнинг Hebei Good Hope Logistics Development компанияси Ангренда электромобиллар ишлаб чиқарувчи лойиҳани ишга тушириши маълум бўлганди. Шунингдек, Fiat Chrysler, Henan Suda компаниялари ҳам Ўзбекистонда автомобиль ишлаб чиқаришга қизиқиш билдиргани ҳақида хабарлар тарқалган. 2019 йил августида эса Инновацион ривожланиш вазирлиги E-Line Kazakhstan компанияси билан электромобилларни ишлаб чиқариш борасида ўзаро ҳамкорликда иш олиб боришга келишганди.
Маълумот ўрнида, Ўзбекистон январь—сентябрь ойларида 558 та электромобиль импорт қилган.
