Ўзбекистон йўлларидаги 3 ЙТҲда 3 қурбон. Тафсилотлар

Ўзбекистон ИИВ ЙҲХББ, шунингдек, ҳудудий бошқармалар хабар берган йўл-транспорт ҳодисалари тафсилотларини тақдим этамиз.

Қум бўронида содир бўлган ЙТҲ сабаб бир киши вафот этди.

Қайд этилишича, 2021 йилнинг 4 ноябрь куни соат 13:30 ларда Навоий вилояти, Конимех тумани ҳудудидан ўтувчи А-379 автомобиль йўлида ҳайдовчи, 1985 йилда туғилган У.Т. бошқарувидаги Captiva ҳамда ҳайдовчи, 1962 йилда туғилган М.Э. бошқарувидаги Nexia ва ҳайдовчи, 1984 йилда туғилган А.Т. бошқарувидаги Cobalt автомобили иштирокида тўқнашув содир бўлган. Ушбу ҳодисага қум бўрони кўрувчанликни чеклагани ва оралиқ масофа сақланмагани сабаб бўлган.

Оқибатда Cobalt автомобилида бўлган йўловчи олган оғир тан жароҳатлари туфайли воқеа жойида вафот этган.

Мазкур ЙТҲ юзасидан Конимех тумани ИИБ ҳузуридаги ТБ томонидан дастлабки тергов ҳаракатлари олиб борилмоқда.

Наманганда Lacetti велосипедчининг ҳаётига зомин бўлди.

Шунингдек, 2021 йил 4 ноябрь куни соат 13:20 ларда, Наманган шаҳар «Зарбдор» МФЙ ҳудудида Lacetti автомашинасини (ишонч қоғози билан) бошқариб кетаётган ҳайдовчи ҳаракат хавфсизлигини таъминлай олмай, йўл четида турган Spark автомашинасига урилиб, йўл четида кетаётган велосипедчи, 1974 йилда туғилган фуқарони уриб юборган. Оқибатда велосипедчи воқеа жойида вафот этган.

Ушбу ҳолат бўйича шаҳар ИИО ФМБ ҳузуридаги ТБ томонидан Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан жиноят иши қўзғатилган.

Уйчида дарахтга урилган Lacetti ҳайдовчиси машина ичида ёниб кетди.

2021 йил 4 ноябрь куни тунги соат 23:30 ларда Уйчи туманида яшовчи 1992 йилда туғилган фуқаро Lacetti автомашинасини Жийдакапа–Уйчи–Чортоқ автомобиль йўлининг 4-километрида Уйчи йўналиши бўйлаб бошқариб кетаётиб, ҳаракат хавфсизлигини таъминлай олмай, бошқарувни йўқотиб йўлнинг чап томон четига чиқиб кетган ва ёнғоқ дарахтига урилиши натижасида автомашина ёниб кетган. Оқибатда ҳайдовчи воқеа жойида вафот этган.

Мазкур ҳолат юзасидан Уйчи туман ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми билан жиноят иши қўзғатилган.

Ҳозирда тергов ҳаракатлари олиб борилмоқда.