Фақатгина чой эмас: шамоллаш мавсумида қандай ичимликлар болалар саломатлигини сақлашга ёрдам беради?

Шамоллаш ва инфексион касалликлар, айниқса, куз ва қишки мавсумда кўп кузатилади. Бундай вақтда болаларнинг иммунитети мустаҳкам бўлиши муҳим саналгани сабаб ҳам ота-оналарга бу борада асқатадиган тавсияларни бериб ўтамиз.

Совуқ кунларда боланинг саломатлигини сақлаш учун нима қилиш керак?

Жисмоний тарбия

Индивидуал қарши кўрсатмалар бўлмаса, доимий равишда жисмоний тарбия билан шуғулланиш керак. Мутахассиснинг кўрсатмаси ва боланинг хоҳишидан келиб чиқиб, тонгги тоза ҳавода бажарилган машқлар вақт ўтказишнинг энг яхши усули ҳисобланади.

Шахсий гигиена қоидаларига риоя қилиш

Болага шахсий гигиена қоидаларига риоя қилиш, қўлларни мунтазам равишда ювиш кераклигини ўргатиш, шу билан бирга, ота-онанинг ўзи ҳам бу борада ўрнак бўлиши керак. Чунки болалар аксарият ҳолларда ота-онасига тақлид қилади. Шунингдек, шахсий идиши, кийими, тароғи, тиш чўткаси ва сочиғи бўлиши зарурлиги, бошқаларникидан фойдаланмаслиги кераклигини ўргатинг.

Кун тартиби бўлиши керак

Боланинг уйқуси меъёрда бўлишига эътибор беринг. Тиниқиб ухламаслик организмни сусайтириб, касаллик хавфини орттириши мумкин.

Стресснинг олдини олиш

Бу мавсумий шамоллашга сабаб бўладиган яна бир муҳим омил саналади. Дам олиши, ижодкорона ўйинлар учун етарлича вақт бўлишига эътибор беринг.

Суюқлик баланси меъёрда бўлишига эътибор қаратинг

Боланинг кун давомида қанча суюқлик ичиши кераклиги ёши, саломатлиги қандайлиги ва мутахассис билан маслаҳатлашиб аниқлаш керак бўлган бир қанча омилларга боғлиқ бўлади.

Нордон сутли ичимликлар

Пребиотиклар бола саломатлиги учун фойдали. Табиий сутдан тайёрланган ичимликлар ичаклар микрофлорасини яхшилашга ёрдам беради. Пребиотик ва пробиотикларни витамин ва минераллар билан умумлаштириш эса янада яхши самара бериб, ҳазм жараёнини ҳам меъёрлаштиради.

Сут фермадан олиниб, то нордон сутли маҳсулотларга айлангунига қадар бир неча текширувлардан ўтган бўлади. Ишлаб чиқаришда тайёр бўлган маҳсулотлар асептик шароитда стерилланган герметик идишларга солинади. Шу сабаб ҳам болалар учун мўлжалланган бундай маҳсулотлар уйда тайёрланганидан кўра узоқроқ сақланиши мумкин бўлади. Харид давомида от-оналар қадоқни яхшилаб кўздан кечириши, тешик ёки шиш борлиги кузатилса, сотиб олмаслиги керак. Шунингдек, болага беришдан аввал маҳсулот таъмини кўриш ҳам мақсадга мувофиқ. Сут ва сутли маҳсулотларда суякларнинг соғлом ўсиши учун муҳим бўлган минерал моддалар, хусусан, кальций бисёр бўлади.

Тўғри танланган шарбат, морс ва кисел

Бола рационига тўғри танланган шарбат, морс, кисел ва шарбатни ўз ичига оладиган ичимликларни қўшса бўлади. Улар бола организми учун муҳим бўлган бир қатор моддаларни ўз ичига олиши мумкин. Болаларга мўлжалланган ичимликларда минерал моддалар, клетчаткалар, органик кислоталар мужассам бўлади. Кисел эса ҳазм жараёнини яхшилаши билан ўзига хосдир.

Боланинг саломатлигини яна қандай қилиб яхшилаш мумкин?

Организмнинг ҳимоя кучини мустаҳкамлаш учун тўғри овқатланиш, рационда саломатлик учун фойдали бўлган дуккакли маҳсулотлар, сабзавот, мевалар, балиқ, гўшт маҳсулотлари ҳамда тухум бўлиши муҳим. Витаминли қўшимчалар ва иммунитетни мустаҳкамлайдиган бошқа медикаментларни эса мутахассис тавсиясига кўра қабул қилиш керак бўлади.