Ютиниш қийин бўлса ва оғриқ қулоққа берса нима қилиш керак?

Шифокорлар тажрибасида бир вақтнинг ўзида бир неча аъзонинг безовта қилаётганидан шикоят қиладиган беморлар кўп учрайди. Айниқса, куз-қиш мавсумида эса қулоқ, томоқ оғриши ҳолатлари кўп кузатилади.

Томоқ ва қулоқдаги оғриқ

Томоқ ва қулоқдаги оғриқ қуйидаги касалликлардан дарак бериши мумкин.

Ларингит — ҳиқилдоқ шиллиқ қаватининг яллиғланиши

Ҳиқилдоқ шиллиқ қаватининг орқа девори яллиғлангани ҳисобига ютинган вақт қулоқда дискомфорт сезилади. Шунингдек, касаллик йўтал ва томоқнинг қуриши билан ҳам кечиши мумкин.

Ангина — (ўткир тонзиллит) танглай муртак безларининг яллиғланиши билан кечадиган ўткир инфексион касаллик

Қулоққа берадиган оғриқдан ташқари ушбу касалликда юқори ҳарорат, тилни караш қоплаши, мушакларда оғриқ ва қалтираш ҳам кузатилиши мумкин.

Отит — қулоқнинг яллиғланиши

Доимий бўлмаган оғриқ кечга бориб кучаяди. Шунингдек, тана ҳароратининг ошиши, иштаҳанинг йўқолиши, қулоқда йирингли ажралма пайдо бўлиши ҳам мумкин.

Қизамиқ, сувчечак

Ушбу касалликлар асосан болаларга хос. Агар фарзандингиз, томоқ ёки қулоқдаги оғриқдан шикоят қилса, тошмадан ташқари, тана ҳароратининг кўтарилиши, бурун битиши кузатилса, зудлик билан шифокорга мурожаат қилинг.

Дифтерия — асосан ҳиқилдоқ, томоқ шиллиқ пардаларининг яллиғланиши ва аъзоларнинг зарарланиши билан кечадиган ўткир инфексион касаллик

Организмдаги интоксикация кучайиши мумкин экани боис ҳам мазкур касаллик хавфли ҳисобланади. Таъкидланган касалликлардан кейин турли салбий асоратлар кузатилиши мумкин. Ўз вақтида шифокорга мурожаат қилинса, бунинг олдини олишга эришса бўлади.

Ютиниш қийин бўлганда ва оғриқ қулоққа берганда нима қилиш керак?

Ҳар қандай ташхисга қараб индивидуал даво чоралари кўрилади, аммо оғриқни камайтириш мумкин бўлган умумий қоидалар ҳам йўқ эмас.

Томоқни чайқаш

Томоқни шифобахш ўтлар, масалан, тирноқгул (календула), мойчечак, маврак билан чайқаш керак. Туз ва сода қўшилган илиқ сув ҳам яхши натижа беради.

Иссиқ қилиш (компресс)

Бунинг учун тана ҳарорати юқори бўлмаслиги керак. Туз солинган иссиқ қопча ёки ароқда намланган докани оғриқ бор соҳага қўйиш керак.

Ингаляция қилиш

Бунда ҳам худди иссиқ компрессдагидек ҳарорат юқори бўлмаслиги керак. Қайнатилган картошка ёки доривор ўсимликлар дамламасидан ингаляция қилишда фойдаланиш мумкин.

Маҳаллий антисептиклар

Хлоргексидин бактерияларни ўлдириши билан самара бериши мумкин.

Антибиотиклар

Шифокор тавсиясига амал қилган ҳолда фойдаланиш тавсия қилинади.

Яллиғланишга қарши дори воситалар

Бундай препаратлар ҳам шифокор кўрсатмасига биноан қабул қилингани яхши. Бу каби чоралар оғриқни камайтириши мумкин.

Оториноларинголог шифокор, тиббиёт фанлари номзоди Владимир Зайцевнинг айтишича, ютинишда оғриқ сезилиши ҳамда ҳароратнинг 38 даражадан 40 даражагача кўтарилиши тонзиллитдан дарак бериши ва бу сурункали бўлиши мумкин. Касаллик асосан совуқ фаслларда, шунингдек, иммунитет сусайганида кучаяди. Бу вақтда яллиғланишга қарши ҳамда ҳароратни туширадиган дори воситаларини қабул қилиш керак. Касалликка қарши фақатгина антибиотиклар билан курашиш мумкин, шу сабаб ўзбошимчалик қилмасдан шифокорга мурожаат қилиш даркор.