Bolalarda stomatitni davolash va oldini olish yo‘llari

Stomatit — bu og‘iz shilliq pardasining yallig‘lanishidir. To‘satdan yoki virusli infeksiya fonida bola hatto eng sevimli ovqatini yeyishdan bosh tortadi, harorati ko‘tariladi, so‘lagi odatdagidan 2-3 baravar kuchliroq oqadi.

Kimga murojaat qilish kerak?

Bunday muammolarda pediatr yoki stomatologga murojaat qilishi mumkin. Dastlabki tekshiruv va davolash bo‘yicha pediatrdan maslahat olish mumkin, ammo takroriy yoki doimiy stomatit bo‘lsa, tish shifokoriga uchragan ma’qul.

Sababi nima?

Stomatit — og‘iz shilliq qavatining virusli, bakterial yoki zamburug‘li infeksiyasi hisoblanadi. Stomatit keng tarqalgan virusli infeksiya, virusli infeksiya asoratlari, shikastlanish natijasi (tilni tishlab olish) yoki bolaning  toza bo‘lmagan turli narsalarni og‘ziga solishi oqibatida kelib chiqadi.

Qanday davolash kerak?

Stomatitni davolash antiseptiklar, antibiotiklar, zamburug‘larga qarshi va davolovchi vositalar bilan og‘iz bo‘shlig‘ini chayish orqali amalga oshiriladi. Stomatit yuzaga kelganda qilinadigan birinchi ish, hatto shifokor bilan maslahatlashishdan oldin bolaga og‘riq qoldiruvchi dori (“Ibuprofen” yoki “Paratsetamol”) berishdir. Tekshiruvdan so‘ng stomatitning xususiyatiga asoslanib, shifokor zarur bo‘lgan yallig‘lanishga qarshi, antibakterial yoki zamburug‘larga qarshi stomatologik gel yoki maz shaklidagi vositalarni tavsiya qiladi.

Bundan tashqari, stomatitda, antiseptik eritmalar bilan og‘izni tez-tez chayish kerak. Hali og‘iz chayishni (og‘ziga suyuqlik olib tupurishni) bilmagan juda yosh bolalarda antiseptiklarni lunjiga tomizish yoki shilliq qavatni antiseptik eritma bilan ehtiyotkorlik bilan artish mumkin.

Shuningdek, stomatit bo‘lgan bolaning ovqatlanishiga alohida e‘tibor berishni talab qilinadi. Agar bola ko‘krak suti bilan oziqlanadigan bo‘lsa, stomatit uchun asosiy oziq ona suti bo‘ladi. Kattaroq bolalar uchun ovqatni suyuq/pyure shaklida, bola uchun qulay bo‘lgan haroratda bergan ma’qul.

To‘g‘ri tanlangan davolanish natijasida bolaning holati terapiya boshlangandan keyingi dastlabki 24-48 soat ichida yaxshilanadi va 5-7 kun ichida stomatit butunlay yo‘qoladi.

Oldini olish uchun nima qilish kerak?

Yosh bolalarda stomatitning oldini olish juda qiyin. Birinchidan, bolalar hamma narsani og‘ziga soladi va bu ularning rivojlanishi uchun ham talab qilinadi, bunga to‘sqinlik qilishning hojati yo‘q. Ikkinchidan, bolalar tez-tez shamollaydi, stomatit ko‘pincha O‘RVI oqibatida paydo bo‘ladi. Uchinchidan, tishlar chiqish paytida stomatit tishlarni agressiv ishlatish natijasida shilliq qavatdagi shikastlanishlar fonida paydo bo‘ladi.

Shu sababli ota-onalarga faqat birinchi tish chiqqan paytdan boshlab har kuni bolaning tishlarini yuvish va stomatolog ko‘rigidan muntazam ravishda o‘tish tavsiya qilinadi.