Tesla ва SpaceX асосчиси Илон Маскнинг реал вақтда ҳисоблаб бориладиган бойлиги 300 миллиард доллардан ошди, деб хабар беради Meduza.
Forbes Real Time рейтинги версиясига кўра, 1 ноябрь ҳолати бўйича Маскнинг бойлиги 13,1 миллиард долларга ошган ва ҳозирда 305,7 миллиард долларни ташкил этмоқда. Bloomberg Billionairese Index бизнесменнинг бойлигини 311 миллиард долларга баҳоламоқда.
Илон Маск бойлигининг асосий қисмини Tesla’даги 21 фоизли улуши ташкил этади. Маскнинг бойлиги ўнлаб миллиард долларга сўнгги бир неча ой ичида Тesla акцияларининг қимматлашуви ҳисобига ортмоқда. Компания акциялари янги ҳисоботлар эълон қилинганидан кейин кўтарила бошлади. 25 октябрда маълум вақт Tesla’нинг бозор капиталлашуви ҳатто 1 триллион долларлик чегарани ҳам бузишга муваффақ бўлди. Ушбу кўрсаткичга эришишга Hertz автоуловларни ижарага бериш сервиси учун 100 мингта электромобиль етказиб бериш келишуви ҳақидаги хабарлар ёрдам берди.
Эслатиб ўтамиз, сентябрь охирида Маск дунёнинг энг бадавлат инсонига айлангач, Безосга 2 рақами туширилган улкан ҳайкал ва кумуш медал юборганини маълум қилганди. Илон Маск Жефф Безосни биринчи бор 2021 йил январида ортда қолдириб, дунёдаги энг бой инсонга айланган эди. Кейинроқ иккинчи ўринга, май ойида эса Bloomberg Billionaires Index версиясига кўра, учинчи ўринга тушиб қолганди. Amazon асосчиси ушбу номни 2017 йилдан буён ўзида сақлаб келаётганди. 2020 йил бошида Маск энг бадавлат инсонлар рейтингининг энг охирги поғонасини эгаллаганди, аммо бир йил ичида унинг бойлиги тахминан 150 миллиард долларга ошди.
Изоҳ (0)