Германия полицияси октябрь ойида Беларусь ва Польша орқали мамлакат чегарасини ноқонуний кесиб ўтишга уринган 5285 кишини қўлга олган, деб хабар беради «Korrespondent.net».
Маълум қилинишича, 2021 йил бошидан буён ҳуқуқ-тартибот ходимлари Германияга шу орқали ўтишга уринган 7832 кишини тўхтатиб қолган.
Сўнгги икки кун ичида полиция Польшадан республика ҳудудига ўтмоқчи бўлган 597 нафар ноқонуний мигрант ушлаган — улар Ироқ, Сурия, Эрон ва Афғонистон фуқароларидир. 18 нафар контрабандачига нисбатан тергов ишлари бошланган. Польшадан Германияга ноқонуний муҳожирларнинг ортиб кетиши август ойидан буён кузатилмоқда.
Аввалроқ Беларусь ва Польша чегарасида 24 октябрь куни кечқурун 60 га яқин ноқонуний муҳожирлар гуруҳи Польшага бостириб кирмоқчи бўлгани, тартибсизликларда икки польшалик аскар яралангани тўғрисида хабар берилганди. Польша офицерлари чегарадан ўтганлар орасида симтўсиқни кесган фуқаролик кийимидаги беларуслик аскарларни таниб қолган.
Беларусь ва Европа Иттифоқи мамлакатлари чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланди. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Изоҳ (0)