1–5 ноябрь кунлари Ўзбекистонда синов тариқасида аҳолини онлайн рўйхатга олиш ўтказилади. Бу ҳақда Давлат статистика қўмитаси хабар берди.
Маълум қилинишича, 2023 йилда ўтказиладиган аҳолини рўйхатга олиш тадбирига пухта тайёргарлик кўриш мақсадида 2021 йил 1–25 ноябрь кунлари Андижон вилоятининг Хўжаобод тумани, Тошкент вилоятининг Юқори Чирчиқ тумани, Хоразм вилоятининг Хива шаҳри ҳамда Тошкент шаҳрининг Яшнобод туманида синов тариқасида аҳолини рўйхатга олиш тадбири ўтказилади.
Давлат статистика қўмитаси ташаббуси билан Ўзбекистон аҳолисини кенг кўламли рўйхатга олиш тадбирлари олдидан 1–5 ноябрь кунлари интернет орқали аҳолини синов тариқасида рўйхатга олиш ўтказилиши режалаштирилган.
Онлайн тадбирда «Census.stat.uz» ҳаволаси орқали Ўзбекистондаги ва хориждаги барча фуқаролар ихтиёрий қатнашиши мумкин.
Аввалроқ республиканинг доимий аҳолисининг 17 432 730 нафарини аёллар, 17 646 460 нафарини эса эркаклар ташкил этиши, яъни эркаклар сони аёлларга қараганда 213 730 нафарга кўплиги тўғрисида хабар берилганди. Шундан меҳнатга лаёқатли ёшдан кичиклар 31,1 фоизни, меҳнатга лаёқатли ёшдагилар 57,8 фоизни, меҳнатга лаёқатли ёшдан катталар эса 11,1 фоизни ташкил қилади.
Мамлакатда аҳоли сони ҳар куни ўртача қарийб 2 минг кишига ошмоқда.
Изоҳ (0)