«Кушербаев кўтараётган муаммолар глобал, уни ҳазм қилиш керак, Дусовда эса эмоция бор, аммо ҳақиқати кўп» — Қашқадарё ҳокими ижтимоий тармоқларда кимларни кузатиши ҳақида

Қашқадарё вилояти ҳокими Зоир Мирзаев ижтимоий тармоқларни доимо кузатиб боришини, айниқса, депутат Расул Кушербаев ҳамда Қобил Дусовлар кўтараётган масалаларга диққат қилишини, шунингдек, қашқадарёлик блогерлар Капитан Каримов ҳамда Ҳусан Комилжоновларни ўқиб боришини маълум қилди. Бу ҳақда вилоят ҳокими «Дарё» мухбири билан суҳбатда гапирди.

«Ҳар куни тонгда биринчи галда ‘Daryo.uz’, ‘Kun.uz’, ‘Gazeta.uz’ ҳамда Ўзбекистон миллий ахборот агентлигини диққат билан ўқиб чиқаман. Расмий хабарларни ўқиб чиққанимдан сўнг, кўпчилик раҳбарларга долзарб масалаларни қўювчи депутат Расул Кушербаевнинг шахсий каналини кузатаман. Қолаверса, Қобил Дусовни, қашқадарёлик блогерлардан — Капитан Каримовни, Ҳусан Комилжоновларни ўқийман. Масалан, депутат Кушербаевнинг шахсий Telegram-каналида кўтариб чиқилаётган муаммолар глобал, уни фақат ҳазм қила олиш керак. Танасидан ўтказиш керак. Қобил Дусовда ҳам. Тўғри, Қобил Дусовда эмоция бордир. Аммо ичида ҳақиқати бор. ‘Асанов формати’ деган канални ҳам кузатаман. Элдар Асановда одамни мулоҳазага йўналтирадиган, миллат тақдири, тил тақдири ва қадриятларни эсга туширувчи кўп гаплар бор», — дейди вилоят ҳокими Зоир Мирзаев.

Зоир Мирзаев суҳбат давомида журналистлардан Шерзод Қудратхўжа билан доимий мулоқот қилиб туришини, фикр алмашишини маълум қилган.

«Шерзод Қудратхўжа билан кўп мулоқот қиламиз. Фикр алмашамиз. У янгилик қилса, менга юборади, мен эса унга. Хуллас, доимий равишда фикр алмашамиз. Боиси Қудратхўжада журналистик ёндашув, креатив ғоялар кўп. Иши ҳам менга маъқул. Масалан, бугун Қашқадарёда бўлса, эртага Сурхондарёда. Шунингдек, икки-уч соатлик муаммоларни қисқа вақтда томошабинга етказа олади. Республикадаги муаммолардан хабардор ва шу муаммоларни чиройли олиб чиқади», — дейди вилоят ҳокими.

Қашқадарё ҳокими «Дарё» мухбирининг «вилоятдаги ҳар қандай муаммо ижтимоий тармоқлар ёки интернет сайтларида ёритилиши биланоқ шахсан муносабат билдирасиз. Вилоятдаги ташвишлардан ортиб ижтимоий тармоқларни шахсан ўзингиз кузатасизми? Ёки муаммолар ҳақида матбуот котибингиз хабар берадими?», деган саволига «вилоятга тааллуқли барча муаммони шахсан ўзим ўқийман ва масъулларга муаммо билан шуғулланиш ҳақида топшириқ бераман», — деди.

«Туманларга ёки вилоятнинг энг чекка ҳудудига йўлга чиққанимда йўлда юришга икки соат вақт сарфлайман. Йўл юриш учун кетган икки соат вақтимни беҳуда сарфламаслик мақсадида шундай пайтда Facebook’га кириб, вилоятга тааллуқли барча муаммолар билан танишиб чиқаман. Ва ҳар бир муаммони тегишлилиги бўйича ўринбосарларимга, ташкилот раҳбарларига юбориб, муаммо билан шуғулланиши кераклиги ҳақида топшириқ бераман. Шунингдек, МТРКнинг интернетдаги манзилига кириб, ретро асарлар, ретро қўшиқларни эшитаман. Узоқ йўлга чиққанимда бир соат ёки икки соат йўлда юришимга тўғри келса, машинада йўл-йўлакай шундай асарларни тинглаб бораман», — дейди вилоят ҳокими Зоир Мирзаев саволга жавоб берар экан.