2023/2024-ўқув йилидан Тошкент давлат юридик университетига ўқишга киришда ҳуқуқий фанлардан тест топшириш амалиёти жорий этилади. Бу ҳақда Telegram’даги «Ҳуқуқий ахборот» канали хабар берди.
Бугунги кунда Тошкент давлат юридик университетига ўқишга киришда абитуриентлар 2 та бўлимдан иборат 5 та фан мажмуасидан тест синовлари топширади. Булар:
- 1-бўлимда барча йўналишлар учун мажбурий 3 та фан – она тили (ўзбек, рус ёки қорақалпоқ тили), математика ва Ўзбекистон тарихи;
- 2-бўлимда юриспруденсия таълим йўналиши бўйича 2 та фан – тарих ва чет тили фанлари.
Мазкур таклифнинг жорий этилиши бир қатор ижобий натижаларга хизмат қилади, хусусан:
- мактаб ёшиданоқ болаларнинг ҳуқуқий фанларни чуқур ўзлаштиришига, конституция ва қонунларни пухта ўрганишига;
- мактабларда сифатли, халқаро стандартларга мос юридик дарсликларнинг яратилишига;
- ҳуқуқшунослик фанларидан таълим берувчи ўқитувчиларга нисбатан қўйиладиган талаблар ошиши натижасида уларнинг малакасини доимий ошириб бориши учун мустаҳкам замин яратишга;
- ТДЮУга дастлабки ҳуқуқий билимларга эга ёш авлод вакиллари кириб келишига эришилади.
Эслатиб ўтамиз, 2021 йилнинг июнида «Тошкент давлат юридик университети қошидаги академик лицейнинг битирувчилари Тошкент давлат юридик университетига якка тартибда суҳбат ўтказиш орқали ўқишга қабул қилиш тартиби тўғрисидаги низомни тасдиқлаш ҳақида»ги буйруқ Адлия вазирлигида давлат рўйхатидан ўтказилганди. Низомга кўра, айрим абитуриентлар Тошкент давлат юридик университетига имтиҳонсиз қабул қилиниши мумкин.
Изоҳ (0)