Ҳиндистон Хитойнинг чегара ҳудудларини ҳимоялаш тўғрисидаги янги қонунидан хавотирда эканини билдирди. Бу ҳақда Reuters агентлигига таяниб, Tengrinews хабар берди.
Хитой 14 та қўшни давлат, жумладан, Россия, Шимолий Корея ва Ҳиндистон билан қуруқликдаги чегараларини ҳимоя қилиш ва улардан фойдаланиш бўйича янги қонунни қабул қилган. Қонун Хитой халқ озодлик армиясига ва давлат муассасаларига мудофаа чизиғини ҳимоя қилишда, инфратузилмани мустаҳкамлаш ва чегара ҳудудларида қурилишларни амалга ошириш йўлида тинч аҳолидан фойдаланиш борасида кенг ваколатларни тақдим этади.
Ҳиндистон Ички ишлар вазирлиги вакили Ариндам Багчининг маълум қилишича, Хитойнинг бу каби қонунни қабул қилиш борасидаги қарори чегараларни бошқариш, шунингдек, чегара масаласида мавжуд икки томонлама келишувларга таъсир кўрсатиши мумкин.
«Хитойнинг чегараларни бошқариш, шунингдек, чегара масаласи бўйича мавжуд икки томонлама келишувларга таъсир кўрсатиши мумкин бўлган қонунни қабул қилиш борасидаги бир томонлама қарор бизда хавотир уйғотмоқда», — дейди ТИВ расмий вакили.
Маълумот учун, Хитой ва Ҳиндистон ўртасида Кашмир шимолидаги тоғли ҳудуднинг бир қисми, шунингдек, шимоли-шарқий Аруначал-Прадеш штатидаги қарийб 60 минг квадрат километр майдон кимга тегишли экани билан боғлиқ азалий келишмовчилик мавжуд. Амалдаги назорат чизиғи Ладакҳ ҳудудидан ўтади. 1962 йили ушбу келишмовчилик чегара урушига айланиб кетган. 1993- ва 1996 йилларда Хитой ва Ҳиндистон ўртасидаги низоли жойларда тинчликни сақлаш тўғрисидаги келишув имзоланган. Бироқ бунга қарамай томонлар ўртасида кескинлик ҳамон давом этмоқда. Хусусан, 2020 йилда Хитой ва Ҳиндистон ўртасидаги чегаранинг баҳсли ҳудудида содир бўлган тўқнашув оқибатида 20 нафар ҳинд аскари ҳалок бўлганди.
Изоҳ (0)