Америка ҳукумати Афғонистонда давом этаётган инқироздан жабр кўрган инсонлар учун қарийб 144 миллион долларлик гуманитар ёрдам юборади. Ажратилган пуллар, хусусан, афғонларни озиқ-овқат ва зарурий дори воситалари билан таъминлашга, шунингдек, қишга тайёрлашга йўналтирилади. Бу ҳақда Оқ уй баёнотига таяниб, «Коммерсантъ» хабар берди.
АҚШ администрацияси пресс-релизида ёзилишича, маблағлар минтақадаги 18,4 миллиондан ортиқ афғонга, шунингдек, қўшни мамлакатлардаги қочоқларга тўғридан-тўғри ёрдам кўрсатиб келаётган мустақил гуманитар ташкилотлар орқали келиб тушади. Ушбу сумма билан қўшиб ҳисобланганда Вашинтон томонидан 2021 йилда афғонлар учун ажратилган жами гуманитар ёрдам миқдори 474 миллион долларга етмоқда, бу бошқа мамлакатлар орасида энг йирик сумма ҳисобланади.
Эслатиб ўтамиз, БМТ Афғонистонга ёрдам кўрсатиш учун Ўзбекистоннинг Термиз шаҳрида асосий логистика марказини очганди. Октябрь ойи ўрталарида ушбу логистика марказига БМТ Қочқинлар иши бўйича бошқармасининг Афғонистонга аталган 100 тонналик инсонпарварлик ёрдами олиб келинган эди. Ушбу гуманитар ёрдам юк машиналарига ортилиб Термиздан «Ҳайратон» чегара пункти орқали Афғонистоннинг Мозори-Шариф шаҳрига етказилиши лозим эди.
Маълумот учун, 14 сентябрь куни Ўзбекистон Афғонистонга турли озиқ-овқат маҳсулотлари, бирламчи зарур товарлар, дори-дармонлар, кийим-кечак ва пойабзаллардан иборат инсонпарварлик ёрдами юборганди.
Изоҳ (0)