Коммунал хизматлар АҚШ шимоли-шарқига ёпирилган бўронли шамол оқибатида электр таъминотисиз қолган юз минглаб уй ва корхоналар фаолиятини қайта тиклаш устида иш олиб бормоқда, деб хабар беради «Интерфакс».
Массачусетс штати Фавқулодда вазиятлар бўйича агентлигининг маълум қилишича, 28 октябрь тонгида қарийб 300 минг истеъмолчи электр таъминотисиз қолган. Род-Айлендда ҳам яна бир неча минг электр узилишлари қайд этилган.
Коммунал хизматлар вакилларининг сўзларига кўра, Массачусетс штатининг жануби-шарқидаги айрим туманларда электр энергияси таъминотини тўлиқ қайта тиклаш учун бир неча кун талаб этилиши мумкин. Ушбу ҳудуднинг баъзи шаҳарларида 28 октябрь ҳолати бўйича 75 фоиз истеъмолчи электрсиз қолмоқда.
Куинсида (Массачусетс штати) бўрон турар жой комплексининг томини учириб юбориши оқибатида 12 та квартирада яшовчи фуқаролар меҳмонхонага кўчишга мажбур бўлган. Қўшни Веймутда Қизил хоч электрсиз қолган инсонлар учун вақтинча бошпана очган.
Нью-Жерсида автомобиль ҳайдовчиси вафот этган. Моррис шаҳарчасида бир киши дарахт шохининг қулашидан жароҳат олган. Нью-Йорк ҳукумати, шунингдек, 26 октябрь куни Лонг-Айленд қирғоқларида бедарак йўқолган байдаркачининг жасадини топган.
Эслатиб ўтамиз, 2021 йилнинг март ойида АҚШнинг Алабама ва Техас штатларида торнадо содир бўлган ва деярли 70 минг уй электр энергиясидан узилиб қолганди. Август ойида эса Нью-Йоркда «Генри» довули яқинлашиб келаётгани туфайли фавқулодда ҳолат режимини эълон қилинганди.
Мавзуга доир: АҚШни остин-устун қилган «Ида» тўфони. Фоторепортаж
Изоҳ (0)