Нидерландияда «суицид учун кукун»ни сотишда айбланаётган 28 ёшли Алекс С. (тўлиқ исми ошкор этилмаган) устидан суд бошланди. Суднинг биринчи кунида айбловчи томон ушбу кукунни сотиб олган 33 киши вафот этганини маълум қилган. Уларнинг камида 15 нафари айнан мазкур кукун сабаб вафот этган, деб хабар беради Meduza.
Алекс С. 2021 йилнинг июлида қўлга олинган. У Нидерландияда 2013 йили асос солинган «Сўнгги ирода жармияти» аъзоси ҳисобланади. Ушбу жамият аъзолари вояга етган инсонларнинг енгил ва оғриқсиз, шунингдек, бошқа инсон ёрдамида ўз жонига қасд қилиш борасидаги ҳуқуқининг тарафдорларидир. Нидерландияда 2002 йилдан бошлаб даволаб бўлмас касалликка чалинган инсонларнинг эвтаназиясига ва ўз жонига қасд қилишда ассистентлик учун рухсат берилган, аммо буни фақатгина шифокорлар қатъий қоидалар асосида амалга ошириши керак. Агарда ўз жонига қасд қилишда оддий инсон ёрдам кўрсаца, унинг ҳаракатлари жиноят ҳисобланади ва у уч йилгача озодликдан маҳрум этилиши мумкин.
2017 йили «Сўнгги ирода жамияти» ўз жонига қасд қилишга мос келадиган дори воситасини топганини маълум қилган. ОАВларда унга «суицид кукуни» ёки «агент Х» дея таъриф берилган. Унинг нархи 10 евродан арзонроқ ва у ичилганидан кейин бир соат ичида таъсир кўрсатади. Таъкидланишича, уни ичган бемор оғриқ ҳис қилмайди. Жамият ўз иштирокчиларига бу ҳақда маълумот бериши ва бу қонунларни бузиш ҳисобланмаслигини билдирган. Аммо кейинроқ «Сўнгги ирода жамияти» «агент Х»ни тарқатишда иштирок этишни бошлади, 2018 йилда эса Нидерландия прокуратураси бунга қарши чиққан.
Айблов томонига кўра, Алекс С. 2018—2021 йиллар давомида «суицид кукуни» билан савдо қилган ва камида 700 харидорга сотган. У мижозлар билан Telegram ва шифрланган ProtonMail почта сервиси орқали мулоқот қилган. Мазкур дори воситасининг порцияси дастлаб 20 евро турган, кейинроқ Алекс С. уни 30 евродан сотишни бошлаган. Тахминларга кўра, у дори савдосидан қарийб 55 минг евро ишлаб топган.
Алекс С. «суицид кукуни»ни ҳар қандай инсонга, бирор-бир савол бермасдан сотган. Судда у буни принципиал қарашлари сабаб амалга оширганини тушунтирган: «Ҳар қандай инсон ўз танасига эгалик қила олади. Биз ҳеч кимга тегишли эмасмиз ва тақдиримизни ўзимиз белгилаймиз. Мен амалга оширишни хоҳлаган ягона нарса — бу ёрдам бериш имкониятини таклиф этиш эди, шу орқали ўзим ҳам миннатдор бўлардим».
Алекс С. «Сўнгги ирода жамияти»нинг «агент Х»ни тарқатиш сабаб қўлга олинган ягона аъзоси эмас. Сентябрь ойида жамият раиси Ёс ван Вейк ҳам ушланганди. У одамларнинг ўз жонига қасд қилишида ёрдам беришда ва шу каби ишларни ташкиллаштиришни бошқаришда гумонланган, бироқ ҳибсга олинмаган. Октябрь ойида жамиятнинг яна икки аъзоси қўлга олинган — «суицид кукуни»ни олиб-сотиш билан шуғулланган 72 ёшли аёл ва 78 ёшли эркак.
Ишга алоқадор сўнгги шахс — психолог Вим ван Дейк бўлиб, у «Сўнгги ирода жамияти»га деменwия ташхиси қўйилган аёлига эвтаназия учун рухсат берилмагач, келиб қўшилган. Яқинда ван Дейк 100 дан ортиқ одамга «суцид кукуни»ни сотганини тан олган. Унинг сўзларига кўра, эркак жамоатчиликда суицидни эркин танлаш ҳуқуқи борасида мунозараларни юзага келтириш учун шундай йўл тутган.
Изоҳ (0)