Xitoy va Hindiston o‘rtasidagi chegaraning bahsli hududida sodir bo‘lgan to‘qnashuv oqibatida 20 nafar hind askari halok bo‘lgan. Ikki mamlakat hukumati bu to‘qnashuvda bir-birini ayblamoqda, biroq Pekin ham, Dehli ham nizoning avj olib ketishini istamasligini bildirmoqda. Bu haqda Meduza xabar berdi.
Harbiylarning o‘limiga sabab bo‘lgan hodisa Himalayning g‘arbidagi Ladakxda yuz bergan. Hindiston va Xitoy o‘rtasidagi mazkur hududga yetib borish qiyin bo‘lgan va aholi yashamaydigan tog‘li joyda, dengiz sathidan qariyb besh ming metr balandlikda joylashgan.
Mazkur hududdagi bahslarning ildizi XIX asrga borib taqaladi, hozir esa mazkur bahslar ikki mamlakatning mintaqadagi ta‘sir uchun kurashida bir qismga aylangan. Chegaraning ba’zi qismlari haligacha demarkatsiya qilinmagan. 1962-yilda 2000 kishining o‘limiga sabab bo‘lgan mojarodan keyin tomonlar vaqtinchalik chegara chizig‘i haqida kelishib olgan. O‘shandan buyon mazkur chiziq chegara sifatida qaraladi, uni rasman tasdiqlash bo‘yicha esa muzokaralar olib borilmoqda. Rasman belgilangan chegara chizig‘ining mavjud emasligi sababli vaqti-vaqti bilan chegarachilar va harbiylar o‘rtasida to‘qnashuvlar yuz beradi, biroq bir necha o‘n yildan buyon bu to‘qnashuvlar o‘limga sabab bo‘lmagandi.
Hozirgi nizo may oyining birinchi yarmida boshlangan — bir oy davomida bir necha marta mushtlashuv ko‘rinishidagi janjallar yuz bergan, ularda 100 nafardan ortiq harbiy xizmatchi jarohat olgan. Mojaro Hindiston tomonda chegaraoldi infratuzilmasini yaxshilash bo‘yicha yaqinda boshlangan ishlar sababli yuzaga keldi. Xitoy bu ishlarga qarshi chiqdi: agar jiddiy mojaro yuz beradigan bo‘lsa, mazkur infratuzilma Hindistonga tezkorlik bilan chegaraga harbiylar otryadi va qurollarni yetkazish imkonini beradi.
Askarlarning o‘limi bilan yakunlangan to‘qnashuv 16-iyunga o‘tar kechasi yuz berdi. Tosh va tayoq ishlatilgan qo‘l jangida yuz nafardan ortiq askar ishtirok etgan, o‘qotar qurol ishlatilmagan. Natijada 20 nafar hind askari, shu jumladan, uch nafari to‘qnashuv vaqtida, 17 nafari esa olingan jarohatlar va sovuq urishi oqibatida keyinroq halok bo‘lgan. Hind OAVlari 43 nafar xitoylikning halok bo‘lgani haqida xabar bergan, Xitoy tomoni esa yo‘qotishlar bo‘lganini tasdiqlagan, biroq halok bo‘lganlar yoki jarohatlanganlar sonini ma’lum qilmagan.
Hindiston yuz bergan voqea uchun javobgarlikni Xitoyga yuklagan va uni shu paytgacha mavjud bo‘lgan holatni bir tomonlama buzishda ayblagan. O‘z navbatida, Pekin mojaro hind askarlarining chegara chizig‘ini kesib o‘tgani sababli yuzaga kelganini ma’lum qilgan.
Shu bilan birga, tomonlar nizoning davom etishini istamasligini yana bir bor ta’kidlab o‘tgan. Xitoy Tashqi ishlar vazirligining ma’lum qilishicha, chegaradagi vaziyat barqaror va uni nazorat qilish mumkin. Hindiston bosh vaziri Narendra Modi esa Xitoy bilan tushunmovchilik mojaroga olib kelmasligiga umid bildirgan. Chegara hududidagi harbiy qo‘mondonlik vakillari muzokaralarning yangi bosqichini boshlagan.
Izoh (0)