Тинчлик бўйича Нобель мукофотини топшириш маросими 2020 йилги тадбирдан фарқли ўлароқ, Ослода жонли тартибда ўтказилади. Бу ҳақда Норвегия Нобель қўмитасига таяниб, «РБК» хабар берди.
«Нобель қўмитаси 2021 йилда Тинчлик бўйича Нобель мукофотини топшириш маросими жонли тарзда 10 декабрь куни Осло ратушасида ўтказилиши бўйича қарор қабул қилди», — дейилади хабарда.
Шунингдек, қўмита 2021 йилги лауреатлар Мария Ресса ва Дмитрий Муратов маросимга ташриф буюришига умид билдирган. Қоидаларга кўра, уларга медал, диплом ва 10 миллион швед кронаси (1,2 миллион долларга яқин) миқдоридаги пул мукофоти кўрсатилган ҳужжат топширилади.
Эслатиб ўтамиз, 8 октябрь куни тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.
Аввалроқ пандемия туфайли 2021 йилда Нобель мукофоти Швецияда топширилмайдиган бўлгани тўғрисида хабар берилганди.
Маълумот учун, адабиёт йўналиши бўйича 2021 йилги Нобель мукофотига Буюк Британияда яшаб ижод қилаётган танзаниялик ёзувчи Абдураззоқ Гурна лойиқ кўрилган. Кимё бўйича Нобель мукофоти германиялик Бенжамин Лист ва америкалик Дэвид Макмилланга «ассиметрик органокатализни ривожлантиргани учун» берилади.Физика бўйича Нобель мукофотининг бир қисми америкалик иқлимшунос Сюкуро Манабе ва германиялик олим Клаус Хасселманга Ер иқлимини физик моделлаштириш ва глобал исишнинг ишончли таҳлили учун, иккинчи қисми эса италиялик физик Жоржо Паризига атомлардан сайёраларгача бўлган физик тизимларда тартиб ва тебранишларнинг ўзаро таъсирини кашф қилгани учун берилади. Иқтисод бўйича 2021 йилги совринга америкалик иқтисодчилар Дэвид Кард, Жошуа Ангрист ва Хидо Имбенс сазовор бўлган.
Изоҳ (0)