Stokgolmda adabiyot yo‘nalishi bo‘yicha 2021-yilgi Nobel muokofoti sohibi e’lon qilindi. Mukofot Buyuk Britaniyada yashab, ijod qilayotgan tanzaniyalik yozuvchi Abdurazzoq Gurnaga nasib qildi.

Abdurazzoq Gurna

Foto: Getty Images

Adabiyot yo‘nalishidagi Nobel muallifga mustamlakachilikning murosasiz oqibatlari hamda madaniyatlar va qit’alararo sarson bo‘layotgan qochoqlar qismatini o‘z asarlarida yoritgani uchun berildi.

O‘tgan yili amerikalik shoira Luiza Glyuk Nobel mukofotini adabiyot yo‘nalishida qo‘lgan kiritgan edi.

1948-yilda Britaniya mustamlakasidagi Zanzibarda musulmon arablari oilasida tug‘ilgan Gurna 20 yoshida (u vaqtda orol Tanzaniya hududi hisoblangan) Angliyaga ko‘chib kelgan. U Britaniyada taniqli yozuvchiga aylandi va zamonaviy postkolonial ilmiy izlanishlar mualliflari qatoriga kirdi. Gurnaning “Jannat” (1994-yil) romani Buker va Uitbred mukofotlari uchun asosiy nomzodlar qatoriga kirgan, “Dengiz bo‘yida” romani (2001) ham Buker mukofotiga nomzodlik qilgan.

Avval fiziologiya va tibbiyot, fizika, kimyo yo‘nalishlari bo‘yicha 2021-yilgi Nobel mukofotining sohiblari aniqlangandi.

Endi 8-oktabrda tinchlik uchun (Osloda e’lon qilinadi) va 11-oktabr kuni Shvetsiya banki tomonidan Alfred Nobel xotirasiga iqtisodiyot yo‘nalishidagi laureatlar e’lon qilinadi.

Mukofotni topshirish marosimi 10-dekabr — Alfred Nobel vafot etgan kunda bo‘lib o‘tadi. Odatda Nobel mukofoti sovrindorlarini Shvetsiya qiroli Stokgolmda shaxsan tabriklardi (Osloda taqdirlanadigan Tinchlik mukofoti sovrindorlari bundan mustasno). Biroq koronavirus pandemiyasi tufayli 2021-yilda xuddi o‘tgan yilgi kabi tantanali marosim va ziyofat bo‘lmaydi. G‘oliblar onlayn tarzda taqdirlanadi.