Бразилия ҳукуматининг коронавирус пандемиясига қарши курашдаги ҳаракатлари юзасидан текширув ўтказган мамлакат Сенати комиссияси кўпчилик овоз билан президент Жаир Болсонаруга қарши айбловларни ёқлаб овоз берди. Бу ҳақда маҳаллий ОАВларга таяниб, «Интерфакс» хабар берди.

Овоз бериш натижаларига кўра, комиссиянинг 11 нафар сенаторидан еттитаси Болсонаруга нисбатан айбловни ёқлаган.

Болсонару ва ҳукуматнинг бошқа аъзолари коллектив иммунитетга эришиш умидида коронавируснинг аҳоли орасида тарқалишига йўл қўйганликда айбланмоқда.

Комиссия ҳисоботида пандемиянинг мамлакатга кўрсатган улкан таъсири сабаб 78 нафар шахс, жумладан, Болсонаруга ҳамда иккита компания жиноий иш қўзғатиш тавсия этилган. Сенаторлар шахсан Болсонаруни тўққизта жиноят бўйича айблаш таклифини билдирган, хусусан, жиноятчиликка, фирибгарликка ва инсониятга қарши жиноятларга ундаш.

Сенат комиссиясининг ҳисоботи энди Бразилия бош прокуратурасига йўлланади. Аммо бош прокурор Аугусто Арас президентнинг иттифоқдоши ҳисобланади ва у Болсонаруга нисбатан айблов эълон қилмаслиги кутилмоқда.

Шунингдек, тахминларга кўра, комиссия ҳисобот нусхасини Гаагадаги Халқаро жиноят судига йўналтириши мумкин. Болсонарунинг ўзи комссиянинг ҳисоботини холис деб ҳисобламаслигини билдирган.

«Улар мени геноцидда айламоқда, фирибгар, фалсификатор ва яксон қилувчи деб атаяпти. Бу йигитлар қилган иш, бемаъни», — дейди президент.

Шу билан бирга, АҚШ собиқ президенти Дональд Трамп Бразилия еткачисининг тарафини олиб чиққан. «У Бразилия халқи учун қаттиқ курашмоқда ва уни яхши кўради — худди мен буни Қўшма Штатлар учун қилганим каби», — дея таъкидлайди Трамп.

Аввалроқ Бразилия президенти ҳарбий тўнтариш уюштиришга тайёргарлик кўришда айблангани, Болсонару эмланганлик сертификати йўқлиги учун Нью-Йорк ресторанларига киритилмагани тўғрисида хабар берилганди.