Ҳарбийлар томонидан ҳибсга олинган Судан бош вазири бир суткадан сўнг уйига қайтди

Ҳарбийлар томонидан ағдарилган Судан бош вазири Абдулла Хамдок ҳамда унинг рафиқасига 27 октябрь — ҳисбга олинганидан бир кун ўтиб уйига қайтишга рухсат берилди. Бу ҳақда бош вазир канцеляриясига таяниб, «Интерфакс» хабар берди.

Хамдок офисининг баёнотида айтилишича, ҳукуматнинг бошқа амалдорлари ҳибсда қолмоқда, улар қаерда сақланаётгани номаълум. Шу билан бирга, бош вазир ва унинг рафиқаси Хартумдаги уйида «қаттиқ қўриқланаётгани» айтилди. Улар уйдан чиқиши ёки қўнғироқ қила олиш-олмаслигига аниқлик киритилмаган.

АҚШ давлат департаменти вакили Нед Прайснинг маълум қилишича, давлат котиби Энтони Блинкен Судан бош вазири озод этилгач, у билан телефон орқали суҳбатлашган.

«Давлат котиби бош вазирнинг ҳибсдан озод этилишини олқишлаган ва Судан Қуролли кучларини ҳибсдаги барча етакчиларни озод қилишга ҳамда уларнинг хавфсизлигини таъминлашга яна бир бор чақирди», — дейилади хабарда.

Таъкидланишича, Блинкен давом этаётган ҳарбий тўнтариш юзасидан хавотирини билдирган ва қуролли кучларни намойишчиларнинг ҳаракатларига жавобан вазмин бўлишга ва зўравонликдан қочишга чақирган.

Шунингдек, ғарб ОАВлари Судан Фуқаролик авиацияси бошқармаси 30 октябрга қадар Хартум аэропортидан амалга ошириладиган барча рейслар тўхтатилгани ҳақида ёзмоқда. «Хартум аэропортига йўналтирилган ва ундан амалга ошириладиган барча рейслар мамлакатдаги вазият сабаб 30 октябрга қадар тўхтатилди», — дейди Фуқаролик авиацияси бошқармаси бошлиғи Иброҳим Адлан.

Эслатиб ўтамиз, Судан ҳарбийлари 25 октябрга ўтар кечаси мамлакат муваққат ҳукуматининг бир қатор вазирларини, жумладан, муваққат бош вазир Абдулла Хамдокни ҳибсга олганди.

Суданда ҳарбийлар ва фуқаролик кучлари ўртасидаги муносабатларда инқироз бир неча ҳафтадан бери давом этмоқда. Зиддиятларни мулоқот орқали ҳал қилишга уринишлар кутилган натижага олиб келмаган, қарама-қарши лагерлар ўз тарафдорларини кўчаларга олиб чиққан. Норозилик намойишлари оқибатида етти киши ҳалок бўлган ва юздан ортиқ одам жароҳат олгани айтилмоқда.

Судан армияси Хартумдаги давлат телерадиостанцияси биносини назоратга олган. Кўплаб ходимлар ҳибсга олинган. Пойтахтда мобил алоқа ва интернет блокланган.