Вашингтон администрацияси Пхеньянга КХДРга нисбатан ҳеч қандай душманлик ниятида эмаслигини маълум қилган ва энди Шимолий Корея томонининг жавобини кутмоқда. Бу ҳақда Америка ташқи сиёсий идораси матбуот хизмати раҳбари Нед Прайсга таяниб, «ТАСС» хабар берди.
«Биз Корея яриморолининг тўлиқ денуклеаризациясига эришишда дипломатияни энг самарали йўл деб ҳисоблаймиз. Биз КХДРга мамлакатга нисбатан душманлик ниятида эмаслигимизни ва у билан дипломатик алоқаларга тайёр эканимизни тушунишини аниқ билдирдик. Қатор баёнотларимизда буни аниқ айтиб ўтдик ва энди жавоб кутяпмиз», — дейди у.
Шунингдек, ташқи сиёсий идора вакилига 31 октябрь куни Глазгода ўтказиладиган БМТнинг иқлим ўзгариши бўйича 26-конференциясида АҚШ ва КХДР вакиллари учрашиши мумкинлиги борасида савол берилган. Прайс бу каби алоқалар борасида «бирор-бир режадан хабардор эмаслигини» таъкидлаган.
Аввалроқ Шимолий Корея Жанубий Корея билан алоқаларни тўлиқ тиклашга қарор қилгани тўғрисида хабар берилганди. Маълум бўлишича, бу ташаббус дастлаб Шимолий Корея раҳбари Ким Чен Ин томонидан илгари сурилган. Жанубий Корея эса уни қўллаб-қувватлаган.
Мавзуга доир: Жанубий Корея айрим ОАВларнинг КХДРда тўнтариш содир бўлгани тўғрисидаги баёнотларини рад этди
Изоҳ (0)