Хитой АҚШни «ягона Хитой» принципига ва Тайван масаласи бўйича мажбуриятларига риоя қилишга, шунингдек, орол билан ҳар қандай расмий алоқаларни зудлик билан тўхтатишга чақиради. Бу ҳақда Хитойнинг Вашингтондаги элчихонаси баёнотига таяниб, «РБК» хабар берди.
26 октябрь куни АҚШ давлат котиби Энтони Блинкен Америка Тайваннинг БМТ тизимидаги кенг иштирокини қўллаб-қувватлашини маълум қилганди. Унинг фикрича, «Тайваннинг чиқариб юборилиши БМТнинг муҳим ишига ва у билан боғлиқ органлар фаолиятига путур етказади».
«Дунёда битта Хитой мавжуд ва ХХР ҳукумати бутун Хитойни ифодаловчи ягона расмий ҳукумат ҳисобланади. АҚШни Тайван билан барча расмий алоқаларни, масъулиятсиз ва нотўғри баёнотлар беришни тўхтатишга, шунингдек, Хитой—Америка муносабатларидаги умумий вазиятни сақлаб қолиш, шу билан бирга, Тайван бўғозида тинчлик ва барқарорликни таъминлаш йўлида аниқ чораларни кўришга чақирамиз», — дейилади элчихона баёнотида.
Шунингдек, баёнотда қайд этилишича, Тайваннинг БМТ каби халқаро ташкилотлар фаолиятида иштирок этиши «ягона Хитой» принципларига мос равишда амалга оширилиши керак. «БМТ — бу ҳукуматлараро халқаро ташкилот бўлиб, унга фақат суверен давлатлар қўшила олади. Тайван билан боғлиқ муаммолар АҚШ қадриятлари деб аталувчи муаммолар эмас, балки жиддий сиёсий муаммолар ҳисобланади», — дейилади дипломатик миссия хабарида.
Аввалроқ The Wall Street Journal АҚШ махсус операция кучлари ва Денгиз пиёдалари корпуси контингенти Тайванда маҳаллий қўшинларни махфий равишда ўқитаётгани ҳақида хабар берганди. Таъкидланишича, АҚШ махсус операция кучларининг 20 га яқин ходими Тайван қуруқлик қўшинларининг кичик гуруҳини шуғуллантирмоқда. Денгиз пиёдалари, ўз навбатида, маҳаллий денгиз флоти билан ишлаяпти. Нашр манбасининг аниқлик киритишича, АҚШ ҳарбийлари Тайванда камида бир йилдан буён бўлиб турибди.
Изоҳ (0)