Ташқи ишлар вазири Абдулазиз Комилов 27 октябрь куни Эрон президенти Иброҳим Раисий билан музокаралар ўтказди. Бу ҳақда Эрон ТИВ матбуот хизматига таяниб, «Gazeta.uz» хабар берди.
Маълум қилинишича, ташқи ишлар вазири Абдулазиз Комилов бошчилигидаги Ўзбекистон делегацияси Теҳрон шаҳрида бўлиб ўтаётган Афғонистонга қўшни давлатлар ташқи ишлар маҳкамалари раҳбарларининг учрашувида иштирок этмоқда.
Учрашувда Раисий Эрон ва Ўзбекистон ўртасидаги муносабатларни қардош ва ривожланиб бораётган сифатида тавсифлаб, «Эрон Ўзбекистон билан турли сиёсий, иқтисодий ва маданий соҳалардаги алоқаларни ривожлантиришда ҳеч қандай чеклов кўрмаётганини» таъкидлаган.
Иброҳим Раисий Абдулазиз Комилов билан учрашувда Теҳрон ва Тошкент ўртасидаги ҳамкорликнинг умумий томонлари ва имкониятларига тўхталиб, «Эрон ва Ўзбекистон биродарлик ва қариндошлик алоқаларига эга», — деган.
«Афғонистонда бегоналарнинг, жумладан, АҚШ борлигининг оқибати азоб, қотиллик, қон тўкиш ва Афғонистонни ушлаб туришдан бошқа нарса эмас. Биз афғон халқига тинчлик ва хавфсизликни ҳис қилишларига ёрдам беришимиз керак», — дея таъкидлаган у.
Иброҳим Раисий Эронда тўрт миллионга яқин афғоннинг борлиги ва Эроннинг уларга инсонпарварлик ёрдамини давом эттиришига тўхталар экан, Афғонистонга қўшни давлатлар ташқи ишлар маҳкамалари раҳбарларининг йиғилишида умумий ечим ва қарашлар топилишига умид қилишини билдирган.
«Икки давлат ўзаро муносабатларни ривожлантириш учун юқори имконият ва салоҳиятга эга ва биз бу имкониятлардан фойдаланишга қатъий қарор қилганмиз», — дейди Ўзбекистон ташқи ишлар вазири Абдулазиз Комилов.
ТИВ раҳбари Ўзбекистон Эроннинг Афғонистондаги вазиятни ўрганиш бўйича ташаббусини олқишлашини таъкидлаган.
«Катта кучлар Афғонистон учун ҳеч нарса қила олмаганини инобатга олсак, Теҳрон саммити катта сиёсий аҳамиятга эга ва биз унинг натижасини тўлиқ қўллаб-қувватлаймиз», — дейди у.
Эслатиб ўтамиз, 7 октябрь куни Ўзбекистон ташқи ишлар вазири Абдулазиз Комилов бошчилигидаги делегация Афғонистон муваққат ҳукумат раҳбарининг сиёсий масалалар бўйича ўринбосари Мулла Абдул Кабир бошчилигидаги Афғонистон раҳбарияти вакиллари билан музокаралар ўтказганди. Учрашув давомида томонлар яқин орада Термиз шаҳрида савдо-иқтисодий масалаларини, жумладан, Сурхон — Пули-Хумри электр узатиш тармоқлари ва Мозори-Шариф—Кобул—Пешовар йўналиши бўйлаб темир йўл қуриш лойиҳаларини амалга ошириш масалаларини муҳокама қилиш учун қўшма музокаралар ўтказиш тўғрисида келишиб олганди.
16 октябрь куни Термизда Ўзбекистон Вазирлар Маҳкамаси ва Афғонистон муваққати ҳукумати вакиллари музокаралар ўтказди. Томонлар музокара давомида қиш мавсуми давомида икки томонлама савдони кенгайтиришни, шунингдек, Афғонистонга етказиб берилаётган ёқилғи ва биринчи галдаги зарурий товарлар ҳажмини оширишни муҳокама қилган.
Изоҳ (0)