Tashqi ishlar vaziri Abdulaziz Komilov 27-oktabr kuni Eron prezidenti Ibrohim Raisiy bilan muzokaralar o‘tkazdi. Bu haqda Eron TIV matbuot xizmatiga tayanib, “Gazeta.uz” xabar berdi.
Ma’lum qilinishicha, tashqi ishlar vaziri Abdulaziz Komilov boshchiligidagi O‘zbekiston delegatsiyasi Tehron shahrida bo‘lib o‘tayotgan Afg‘onistonga qo‘shni davlatlar tashqi ishlar mahkamalari rahbarlarining uchrashuvida ishtirok etmoqda.
Uchrashuvda Raisiy Eron va O‘zbekiston o‘rtasidagi munosabatlarni qardosh va rivojlanib borayotgan sifatida tavsiflab, “Eron O‘zbekiston bilan turli siyosiy, iqtisodiy va madaniy sohalardagi aloqalarni rivojlantirishda hech qanday cheklov ko‘rmayotganini” ta’kidlagan.
Ibrohim Raisiy Abdulaziz Komilov bilan uchrashuvda Tehron va Toshkent o‘rtasidagi hamkorlikning umumiy tomonlari va imkoniyatlariga to‘xtalib, “Eron va O‘zbekiston birodarlik va qarindoshlik aloqalariga ega”, — degan.
“Afg‘onistonda begonalarning, jumladan, AQSh borligining oqibati azob, qotillik, qon to‘kish va Afg‘onistonni ushlab turishdan boshqa narsa emas. Biz afg‘on xalqiga tinchlik va xavfsizlikni his qilishlariga yordam berishimiz kerak”, — deya ta’kidlagan u.
Ibrohim Raisiy Eronda to‘rt millionga yaqin afg‘onning borligi va Eronning ularga insonparvarlik yordamini davom ettirishiga to‘xtalar ekan, Afg‘onistonga qo‘shni davlatlar tashqi ishlar mahkamalari rahbarlarining yig‘ilishida umumiy yechim va qarashlar topilishiga umid qilishini bildirgan.
“Ikki davlat o‘zaro munosabatlarni rivojlantirish uchun yuqori imkoniyat va salohiyatga ega va biz bu imkoniyatlardan foydalanishga qat’iy qaror qilganmiz”, — deydi O‘zbekiston tashqi ishlar vaziri Abdulaziz Komilov.
TIV rahbari O‘zbekiston Eronning Afg‘onistondagi vaziyatni o‘rganish bo‘yicha tashabbusini olqishlashini ta’kidlagan.
“Katta kuchlar Afg‘oniston uchun hech narsa qila olmaganini inobatga olsak, Tehron sammiti katta siyosiy ahamiyatga ega va biz uning natijasini to‘liq qo‘llab-quvvatlaymiz”, — deydi u.
Eslatib o‘tamiz, 7-oktabr kuni O‘zbekiston tashqi ishlar vaziri Abdulaziz Komilov boshchiligidagi delegatsiya Afg‘oniston muvaqqat hukumat rahbarining siyosiy masalalar bo‘yicha o‘rinbosari Mulla Abdul Kabir boshchiligidagi Afg‘oniston rahbariyati vakillari bilan muzokaralar o‘tkazgandi. Uchrashuv davomida tomonlar yaqin orada Termiz shahrida savdo-iqtisodiy masalalarini, jumladan, Surxon — Puli-Xumri elektr uzatish tarmoqlari va Mozori-Sharif—Kobul—Peshovar yo‘nalishi bo‘ylab temir yo‘l qurish loyihalarini amalga oshirish masalalarini muhokama qilish uchun qo‘shma muzokaralar o‘tkazish to‘g‘risida kelishib olgandi.
16-oktabr kuni Termizda O‘zbekiston Vazirlar Mahkamasi va Afg‘oniston muvaqqati hukumati vakillari muzokaralar o‘tkazdi. Tomonlar muzokara davomida qish mavsumi davomida ikki tomonlama savdoni kengaytirishni, shuningdek, Afg‘onistonga yetkazib berilayotgan yoqilg‘i va birinchi galdagi zaruriy tovarlar hajmini oshirishni muhokama qilgan.
Izoh (0)