Самарқанд вилоятида 10 кун ичида ис газидан заҳарланиш билан боғлиқ 4 та ҳолат қайд этилган. Бу ҳақда Паст Дарғом тумани ҳокимлигида ўтказилган брифингда ФВБ вакили Сирожиддин Абдуллаев маълум қилди.
Унинг сўзларига кўра, Самарқанд вилоятида ис газидан заҳарланиш оқибатида 8 киши вафот этган ва бир киши оғир аҳволда шифохонага ётқизилган. Ҳалок бўлган саккиз нафардан беш нафари вояга етмаган болалардир.
Ҳолат юзасидан олиб борилган ўрганишларда табиий газ тармоғига уланган қўлбола иситиш печининг тутун чиқариш мўриси тозаланмасдан, кечаси печни ёқиб ухлаш оқибатида заҳарланиш ва ўлим ҳолати юзага келгани маълум бўлган. Яъни иккита ҳолатда иситиш печининг мўрисидан баҳор, ёз даврида ин қурган қушларнинг уяси чиққан бўлса, бошқа ҳолатда мўри ичига қушларнинг уй қурмаслиги учун латта тиқиб қўйиб, уни олиб ташламасдан, иситиш печидан фойдаланилгани аниқланган. Оқибатда барча заҳарли газлар хона ичига тўпланиб, фуқароларнинг ўлимига сабаб бўлган.
Абдуллаевнинг таъкидлашича, октябрь ойининг бошидан буён 128 та аҳоли уйларида турли кўламли ёнғинлар содир бўлган, 3 киши куйиш жароҳатларини олган. Шунингдек, ҳаво-газ аралашмасининг чақнаши билан боғлиқ иккита ҳолат қайд этилган.
Эслатиб ўтамиз, 2020–2021 йилги қиш мавсумида Хоразмда 31 ёшли аёл ва унинг 10 ёшли қизи, Қорақалпоғистонда бир оиланинг 4 нафар аъзоси ва 2 нафар меҳмон ҳамда Сирдарёда 31 ёшли аёл ва унинг вояга етмаган 3 нафар фарзанди ис газидан заҳарланиб вафот этгани ҳақида хабар берилганди. Шунингдек, Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани ҳақида хабар берилган, кейинроқ улар икки кун аввал турмуш қургани маълум бўлганди.
Изоҳ (0)