Shavkat Mirziyoyev va Afg‘oniston prezidenti bilan “Surxon—Puli-Xumri” elektr uzatish liniyasini qurish loyihasini amalga oshirishni jadallashtirishga kelishdi

Shavkat Mirziyoyev 10-fevral kuni Afg‘oniston prezidenti Ashraf G‘ani bilan telefon orqali muloqot qildi. Prezident matbuot xizmatining xabar berishicha, muloqot davomida Ikki tomonlama munosabatlar va mintaqaviy hamkorlikning dolzarb masalalari ko‘rib chiqildi.

Xususan, prezidentlar sa’y-harakatlarni birlashtirib, yangi “Surxon—Puli-Xumri” elektr uzatish liniyasini barpo etish loyihasini amalga oshirishni jadallashtirishga kelishib oldi. Shu maqsadda rejalashtirilgan ishlarning bajarilishini muvofiqlashtirishning ikki tomonlama mexanizmi yaratiladi, uning doirasida har oy videoanjumanlar o‘tkazib boriladi.

Shuningdek, ko‘p qirrali O‘zbekiston—Afg‘oniston munosabatlarini, shu jumladan, neft-gaz tarmog‘ida, ta’lim sohasida, texnik ixtisosliklar bo‘yicha malakali afg‘onistonlik kadrlarni tayyorlash borasida kengaytirish imkoniyatlari ko‘rib chiqildi.

Davlat rahbarlari O‘zbekiston, Afg‘oniston va Pokiston hamda yetakchi xalqaro moliyaviy institutlarning yuqori darajadagi vakillari ishtirokida o‘tgan transafg‘on transport yo‘lagini qurish loyihasini ilgari surish bo‘yicha uch tomonlama ishchi guruhning birinchi yig‘ilishi muvaffaqiyatli bo‘lganini qayd etdi. Ushbu loyihani amalga oshirishni, shu jumladan, texnik hujjatlarni tayyorlashni va qurilish ishlarini boshlash muhim ekani ta’kidlandi.

Buyuk shoir va mutafakkir Alisher Navoiy tavalludining 580-yilligiga bag‘ishlab 2021-yil mart oyida Hirot shahrida o‘tkaziladigan bayram tadbirlarida O‘zbekiston delegatsiyasi ishtirok etishi yuzasidan kelishuvga erishildi. Bo‘lajak oliy va yuqori darajadagi tadbirlar va muloqotlar rejasi yuzasidan ham fikr almashildi.

Ashraf G‘ani Afg‘onistonda tinchlik va barqarorlikni ta’minlash, ushbu mamlakat iqtisodiyotini tiklash masalalarida ko‘rsatilayotgan har tomonlama ko‘mak uchun davlat rahbariga Afg‘oniston xalqi nomidan minnatdorlik bildirdi.

Eslatib o‘tamiz, 2020-yil 20-oktabrida Kobulda O‘zbekiston delegatsiyasi ishtirokida Afg‘oniston va Osiyo taraqqiyot banki o‘rtasida 110 million dollar ajratishni nazarda tutuvchi “Surxon—Puli-Xumri” elektr uzatish liniyasi qurish loyihasini moliyalashtirish to‘g‘risida bitim imzolangandi.

“O‘zbekenergo” Afg‘onistonga elektr energiyasi yetkazib berishni ko‘paytirish maqsadida “Surxon—Puli-Xumri” elektr uzatish liniyasini qurishga 2018-yilda kirishgan edi. 260 kilometr uzunlikdagi liniya Afg‘onistonga elektr energiyasi yetkazib berishni 70 foizga — yiliga 6 milliard kilovatt-soatgacha ko‘paytirish imkonini beradi. Loyihani amalga oshirish muddati 2020-yil oxirigacha etib belgilangandi.

O‘zbekiston 2002-yildan beri Afg‘onistonga muntazam ravishda elektr energiyasi yetkazib keladi. O‘tgan vaqt mobaynida eksport qilinayotgan elektr energiyasining yillik hajmi 62 million kilovatt-soatdan joriy yil yakuni bilan kutilayotgan salkam 2,6 milliardgacha ko‘paydi. Biroq shu paytgacha yetkazib berish shartnomalari faqat yillik tuzib kelingan. 2019-yilning sentabrida O‘zbekiston Afg‘oniston kompaniyasi bilan elektr energiyasi yetkazib berish bo‘yicha 10 yillik shartnoma imzoladi.